Т.САЙХАН
УИХ-ын чуулганы нэгдсэн хуралдаан 51.4 хувийн ирцтэйгээр эхэллээ. Хуралдаанаар Үндсэн хуулийн цэцийн тухай хууль болон Цэцэд хэрэг хянан шийдвэрлэх тухай хуулийн төслүүлийг хэлэлцэх эсэхийг хэлэлцэж эхэллээ. Энэхүү хуулийн төслөөр АН-ын бүлэг тав хоногийн завсарлага аваад байсан билээ.
АН-ын бүлгийн дарга, УИХ-ын гишүүн О.Цогтгэрэл:- Бүлгийн гишүүд өнгөрсөн хугацаанд хууль санаачлагчидтай уулзаж, ярилцсан. Эмзэглэсэн асуудал олон байна. Энэ том хуулийн концевцыг энэ цаг үед яаран сандран хэлэлцэх гэж байна. Тэгэхээр манай бүлэг энэ хуулийн хэлэлцүүлэгт оролцох боломжгүй гэдгээ мэдэгдэж байна. Олонх энэ хуулиа хэлэлцээд батлах нь та бүхний эрх мэдлийн асуудал.
УИХ-ын гишүүн Ц.Мөнхцэцэг: -Цэцийн хуулийн төслийг нам үл харгалзан, дэмжих зайлшгүй шаардлагатай байна. 1992 оны Үндсэн хуулиас хойшхи 30 жилд төрийн эрх мэдлийн институтын тэнцэл болон тодорхой асуудлаарх алдаа оноогоо дэнсэлж Үндсэн хуулиа өөрчилсөн. Манай эрдэмтэд, Үндсэн хууль судлаачид энэ талаар нэлээд олон жил ярьж ирсэн. Тиймээс та бүхэн дэмжээд энэ өөрчлөлтийг хийх ёстой шүү.
УИХ-ын гишүүн Д.Ганбат: -Энэ хуулийг нэлээд нягт нямбай хэлэлцэж, долоо хэмжиж нэг батлах хууль л даа. Хүний үндсэн эрхийг Үндсэн хуулийн цэц дээр ярьдаг болъё гэдэг бол зөв зүйтэй асуудал. Бидний ярих ёстой батлах ёстой агуулга мөн. Гэхдээ өнөөдөр ингэж түргэн түүхий ярьж боломгүй байна. Тэр тусмаа эрх барьж байгаа намын хоёрхон гишүүн санаачлаад та нар дангаараа баталмааргүй байна. Уг нь үүнд олон нийтийн олон намын хууль тогтоогчдын бүгдийнх нь оролцоо чухал биш юм уу. Энэ маягаараа хүчиндэж болохгүй. Үндсэн хуулиа өөрийг нь зөрчиж байгаа асуудал ч байна шүү дээ.
Эх сурвалж:www.polit.mn