Монгол Улсын Ерөнхий сайд асан Сү.Батболдыг уул уурхайн хөрөнгө оруулалтын мөнгөөр хувьдаа Нью-Йорк хотноо байшин худалдан авсан талаар АНУ-ын хэвлэлүүд шуугиж байна. Энэ тухай “Ройтерс” агентлаг хэрхэн мэдээлснийг орчуулан хүргэе.

Монгол Улсын Ерөнхий сайд асан Сүхбаатарын Батболдыг уул уурхайгаас хулгайлсан мөнгөөрөө Нью-Йорк хотод хоёр байр худалдан авсан болохыг АНУ-ын албаныхан мэдэгдлээ. Тансаг зэрэглэлийн үл хөдлөх хөрөнгөтэй холбоотой мөнгө угаах гэмт хэрэгтэй тэмцэх үеэрээ эл мэдээллийг олж илрүүлсэн болохоо АНУ-ын прокурорууд өнгөрсөн мягмар гарагт мэдэгджээ.

Бруклин дэх улсын прокурорууд хэлэхдээ, Ерөнхий сайд асан Сүхбаатар Батболд болон түүний гэр бүлийнхэн 2012, 2015 онд Манхэттэн хотын төвд байрлах хоёр орон сууцыг нийт 14 сая доллараар худалдаж авсан гэж мэдэгджээ. Тэдний хэлсэнчлэн энэхүү мөнгө нь 2011 онд Хонг Конг-д бүртгэлтэй Catrison Limited компанитай байгуулсан 68 сая ам.долларын уул уурхайн гэрээнээс орж ирсэн гэж үзэж байгаа бөгөөд Ази тивд томоохонд тооцогддог Монголын Эрдэнэтийн зэсийн баяжмалыг тус компани худалдан авах гэрээ байгуулж байсан юм.

Catrison limited компанийн хувьд уул уурхайн туршлага бага боловч тус хэлэлцээрийг хийхэд Сү.Батболд итгэмжлэгдсэн төлөөлөгчөөрөө дамжуулан удирдсан болохыг прокурорууд мэдэгджээ.

Бруклин дахь холбооны прокурорын газрын нөлөө бүхий прокурор Бреон Пийс “Батболд хууль бус авлигын схемээсээ олсон мөнгөөрөө үл хөдлөх хөрөнгө худалдан авсан нь АНУ-ын холбооны хуулийг зөрчсөн үйлдэл” хэмээн мэдэгджээ. Одоо ч парламентын гишүүнээр ажиллаж буй Сүхбаатарын Батболд нь 2009-2012 оны хооронд Ерөнхий сайдаар ажиллаж байсан юм. Энэ асуудлаар түүний хуульч 2020 онд гомдол гаргаж,  “С.Батболдод Нью-Йоркт ямар ч хөрөнгө байхгүй” хэмээн мэдэгдэж байсныг сануулъя. Түүний. Хуульч Орин Снайдер “Ноён Батболд өөрийг нь чиглэсэн худал гүтгэлгийг няцааж, гэм буруугүй гэдгээ батлах боломж учраас шүүх дээр очих өдрийг тэсэн ядан хүлээж байгаа” хэмээн мэдэгдэж байв. Тэр үед С.Батболд энэхүү хэрэгтэй холбоотойгоор шүүхээс ял сонсоогүй үлдсэн билээ.

АНУ-ын Сангийн яам өнгөрсөн хоёрдугаар сард Америкийн үл хөдлөх хөрөнгийн зах зээлээр дамжих хууль бус хөрөнгийн урсгалыг хязгаарлах зорилготой урт хугацааны төлөвлөгөөг албан ёсоор танилцууллаа. Албаныхны мэдээлснээр, 2015-2020 оны хооронд АНУ-д үл хөдлөх хөрөнгөөр дамжуулан 2.3 тэрбум ам.долларын мөнгө угаалт явагджээ.

2012 онд Catrison Limited-ийн Удирдах зөвлөлийн гишүүний хувь эзэмшдэг нэгэн компани Баруун 56-р гудамжинд байрлах Парк Империал барилгаас 3.9 сая ам.доллараар орон сууц худалдаж авсаныг прокурорууд тогтоосон байна. Харин үүнээс нэг жилийн дараа С. Батболдын хүү АНУ-ын банкинд данс нээлгэхдээ уг байрыг шуудангийн хаяг болгон ашиглаж байжээ. Мөн түүний хүү Catrison компанийн Удирдах зөвлөлийн гишүүний эзэмшлийн өөр нэг компанийн 9.9 сая ам.долларын өртөг бүхий байрыг худалдан авах үед хамтран худалдан авагчаар оролцож байсныг тогтоосон байна.

Эх сурвалж:www.polit.mn