Ази тивийн залуучуудыг нэгтгэсэн “ICAPP” байгууллагын Олон Улсын VII бага хурал Улаанбаатар хотноо амжилттай болж өндөрлөлөө. Хуралд Ази тивийн 11 улсын 15 намын 48 залуу улстөрч хүрэлцэн ирж, Монгол Улсаас МАН, ХҮН, АН-ын залуучууд нийтдээ 800 гаруй зочид төлөөлөгчид оролцлоо.

Энэ үеэр дэлхий дахинд залуучуудын парламентад дахь оролцоо бага байгаа асуудал хөндөгдөж байсан. УИХ-ын гишүүн Э.Батшугар Монгол Улс залуучуудынхаа парламентад орох боломжийг үндсэн хуулиараа нээж өгсөн хэмээн тодотгов. Тэрээр “Өнөөдөр дэлхийн хүн амын 60 хувь нь 30-аас доош насны, харин Монголд хүн амын 61 хувь нь 30-аас доош насны залуучууд байна. Харин парламентад төлөөлөл нь бага байна гэсэн шүүмжлэлийг улс орнуудын төлөөллүүд хэлж байна. Ялангуяа аж үйлдвэрийн дөрөвдүгээр хувьсгал, технологийн хөгжлийн эрин үед залуучууд бодлогын түвшинд илүүтэй ажиллаж, эрхзүйн орчинг хөгжлийн хурдтай уялдуулах шаардлага үүсч байгаа юм.

Улс орон бүр өөрийн туршлагыг ярьж байна. Узбекстан гэхэд залуучуудын өөрийн танхимтай байдаг юм байна. Турк улсад залуучуудынх нь байгууллага нь идэвхтэй үйл ажиллагаа явуулдаг. Монголд ч гэсэн залуучуудаа их хуралд оруулах том алхмуудыг хийсэн. Өнгөрсөн онд Үндсэн хуульдаа нэмэлт өөрчлөлт оруулж 126 гишүүнтэй болгосны 48 нь жагсаалтаар орж ирнэ. Энэ нь залуучуудаа парламентад оруулах бололцоог нээсэн алхам болсон” гэв.