П.АМГАЛАН
Монгол Улсын Засгийн газраас хаваржилт хүндэрч, зудын байдалтай болсонтой холбогдуулж өнгөрсөн долоо хоногт гамшгаас хамгаалах өндөржүүлсэн бэлэн байдлын зэрэгт шилжүүлсэн. Хаваржилт хүндэрсэн аймаг, сумдад тусламж үзүүлэх Шуурхай бүлгүүдийг Засгийн газрын шийдвэрээр байгуулсан, сайд нар ахлан ажиллаж байна.
Батлан хамгаалахын сайд Г.Сайханбаяраар ахлуулсан шуурхай бүлэг Архангай аймагт ажиллаж байна.
Ажлын хэсэгт Гадаад харилцааны сайд Б.Батцэцэг, ЭМЯ-ны сайд С.Чинзориг, Ерөнхийлөгчийн Эдийн засгийн бодлогын зөвлөх Б.Даваадалай зэрэг бусад шуурхай бүлгийн гишүүд оролцож байна.
Шуурхай бүлэг Өвөрхангай аймгийн Бүрд суманд ажиллалаа. Сумын хэмжээнд 301.070 мал хаваржиж байна. Сумын хэмжээнд 22 өрхийн
11.9 мянган толгой мал, отор нүүдлээр явж байгаа бөгөөд үүнээс өөрийн аймаг дотроо гурван өрхийн 1.8 толгой мал, өөр аймагт 19 өрхийн арван мянган толгой мал отроор өвөлжиж хаваржиж байна.Сумын нийт нутгаар цагаан зудын цасан бүрхүүлтэй. Цаашид цас ихтэй байгаа тул нэмж орвол өвөлжилт, хаваржилт хүндрэх төлөвтэй байгаа гэлээ.
Бүрд сумын хувьд малын хорогдол 9980 байна. Үүнээс үхэр 116, морь 321, хонь 5508, ямаа 4035. Тус сумын нэгдүгээр багийн арван айлын хаваржаа цасанд дарагдсан байна.
Цасанд саравч хашаа нь дарагдсан айлуудын хашаа саравчийг ухаж өгөхөд техник болон хүн хүчний туслалцаа үзүүлэх, малчид өөрсдийн бэлтгэсэн өвс тэжээлээ хэрэглээд дууссан учраас хямд үнэтэй өвс ногоон тэжээл, хүчит тэжээл, бүрэн найрлагат тэжээл, багсармалын дэмжлэг үзүүлэх шаардлага байгааг хэлэв.
Мөн зам даваа гаргах, өвөлжөө хаваржааны бууц түрэх, зэрэг ажилд хэрэгтэй сайн чанарын ковш хэрэгтэй байна гэдгийг хэллээ.
Бүрд сум нь сүүлийн хоёр жил дарааллан 160 га-д ногоон тэжээл тариалжээ. Га-гын дундаж ургац 20 ц/га-тай гарч байгаа бөгөөд 2023 онд 306 тн буюу 12240 боодол тэжээл худалдан авсан байна.
Сум орон нутгийн хөгжлийн сангийн хөрөнгөөр трактор, дагалдах тоног төхөөрөмжөөр худалдан авсан боловч хүрэлцээ муу байна. Тиймээс улсын төсвөөр малын тэжээл тариалахад трактор, тоног төхөөрөмжийн туслалцаа үзүүлэхийг хүслээ.
Тус суманд хоёрдугаар сарын 24-ний байдлаар А80 нэг тн, АИ92 11 тн, дизель түлш 4.3 тн байна.