П.АМГАЛАН
Монгол Улсын Засгийн газраас хаваржилт хүндэрч, зудын байдалтай болсонтой холбогдуулж өнгөрсөн долоо хоногт гамшгаас хамгаалах өндөржүүлсэн бэлэн байдлын зэрэгт шилжүүлсэн. Хаваржилт хүндэрсэн аймаг, сумдад тусламж үзүүлэх Шуурхай бүлгүүдийг Засгийн газрын шийдвэрээр байгуулсан, сайд нар ахлан ажиллаж буй.
Батлан хамгаалахын сайд Г.Сайханбаяраар ахлуулсан шуурхай бүлэг Архангай аймагт ажиллаж байна.
Ажлын хэсэгт Гадаад харилцааны сайд Б.Батцэцэг, ЭМЯ-ны сайд С.Чинзориг, Ерөнхийлөгчийн Эдийн засгийн бодлогын зөвлөх Б.Даваадалай зэрэг бусад шуурхай бүлгийн гишүүд оролцож байна.
Шуурхай бүлэг Архангай аймгийн Хайрхан суманд ажиллалаа. Хоёрдугаар сарын 20-ны өдрийн байдлаар гаргасан эрсдлийн үнэлгээгээр
Хайрхан сум мөсөн (төмөр) зудтай байна. Мөн сумын хэмжээнд хоёрдугаар сарын 23-ны байдлаар 15.756 толгой мал хорогджээ.
Сумын аюулгүйн нөөцөд 50 тн өвс, 30 тн тэжээл бэлтгэсэн. Үүнээс хоёрдугаар сарын 23-ны байдлаар хураасан нөөцөө зарцуулж, одоогоор нэг тн өвс, 2.5 тн тэжээлийн үлдэгдэлтэй байна.
Мөн сумын хэмжээнд арван өрхийн 23 иргэн, 4200 толгой мал, отор нүүдлээр явж байна.Бусад аймаг буюу Булган аймгийн Сайхан, Баян-Агт сумын нутагт бусад аймгаас арван өрхийн 23 иргэн 4200 гаруй толгой мал отроор өвөлжиж, хаваржиж байгаа гэлээ. Өвөлжилтийн хүрээнд зам хаагдсан 562, холбоо барьж чадаагүй 312, өвс тэжээлийн хомсдол үүссэн 456 өрх байна. Мөн хоёрдугаар сарын 21-ны байдлаар АИ-92, дезилийн 7-10 хоногийн нөөцтэй байна.
Шуурхай бүлгийн хуралдааны үеэр сумын ЗДТГ-аас тулгамдаж асуудал, саналыг дэвшүүллээ.
Тухайлбал, зам гаргахад шаардлагатай туулах чадвар сайтай техник, шатахуунд зарцуулах төсөв санхүү, ЗДТГ-ын автомашины шинэчлэл, өвс, тэжээл болон ЭМТ-ийн авто машины сэлбэг, засвар үйлчилгээ, хөдөө багуудын утасны сүлжээний асуудлыг шийдвэрлэх шаардлагатай байна гэв.
Засгийн газраас өвөлжилтийн хүрээнд олгож буй тэжээлийг Хайрхан сумын 1059 малчин өрхөд олгохоор болов. Тэжээл тээвэрлэх автомашин, шатахууныг аймгийн төвөөс шийдвэрлэнэ гэв. Мөн УОК-оос аймаг, сумаад байгаа нөөц өвсийг хамт хүргүүлэх шаардлага тавьж байгаа гэдгийг хэлж байв. Мөн Засгийн газраас Архангай аймагт олгож буй 675 тн улаанбуудайг богино хугацаанд малчдад хүргэнэ гэлээ.Түүнчлэн БНХАУ-ын Элчин сайдын яамнаас таван сумын 10 өрхөд тус бүр 660 төгрөгийн дэмжлэг үзүүлэхээр болсон учраас өрхийн судалгааг гаргаж олгоно гэв.
Хурлын үеэр АНН-үүдэд үзүүлэх зээлийн шалгуур үзүүлэлтийг багасгаж өгөх, төрийн албан хаагчдын нийгмийн хамгааллыг сайжруулах шаардлагатай байна гэлээ.
Эх сурвалж:www.polit.mn
Эх сурвалж:www.polit.mn