П.АМГАЛАН
Батлан хамгаалахын сайд Г.Сайханбаяраар ахлуулсан шуурхай бүлэг Өвөрхангай аймгийн Баруунбаян-Улаан сумын өвөлжилтийн нөхцөл байдалтай танилцлаа.
Тус сумын Засаг дарга Д.Баатарчулуун "Сумын аюулгүйн нөөцөд
20 тн өвс нөөцөлснөөс 18 тн өвсийг малчид авч, хоёр тооны нөөцтэй байна. Малчдын түвшинд  өвс 450 тн,  гар тэжээл 150 тн, хужир шүү 300 тн бэлтгэсэн. Үүнээс өвс арван тонн, хужир, шүү, 80 тн үлдэгдэлтэй байна. Аймгийн Онцгой комисоос 800 боодол өвсийг малчдад 50 хувийн хөнгөлөлттэй олгосон.
Мөн УОК-оос олгосон 1000 боодол хивгийг малчдад олгосон байна.Одоогоор шатахууны нөөц АИ92 бензин 21 тонн, дизель түлш 3.9 тн, буюу 20 хоногийн нөөцтэй байна" гэлээ.
Шуурхай бүлгийн хуралдааны үеэр тулгамдаж буй асуудлуудыг сумын удирдлагын зүгээс танилцууллаа. Тодруулбал, малчдад өвс тэжээлийг зээлээр болон хөнгөлөлттэй үнээр нийлүүлэхийг хүслээ.

Мөн туулах чадвар сайтай автомашины хүрэлцээгүйн улмаас айл өрхүүдэд очиж зам гаргах зэрэгт бэрхшээл учирж байна. Манай сумын  ЗДТГ болон ИТХ нь нэг автомашинтай. ЭМТ болон бусад төрийн байгууллага туулах чадвар сайтай автомашин байхгүй учир шийдвэрлэж өгөхийг хүслээ. Мөн төрийн албан хаагчдын найман айлын орон сууцыг завсарлах шаардлагатай байгааг хэллээ. Түүнчлэн  гурван сар гараад мал төллөх үеэр  малчид хүн хүч дутдаг учир  сургуулийн амралтыг зохицуулж өгөхийг хүслээ.
Сум, малчдад тулгамдаж буй асуудлыг ирэх долоо хоногийн Засгийн газрын хуралдаанаар танилцуулна гэдгийг шуурхай бүлгийн ахлагч Г.Сайханбаяр  хэллээ.