П.АМГАЛАН
Монгол Улсын Засгийн газраас хаваржилт хүндэрч, зудын байдалтай болсонтой холбогдуулж өнгөрсөн долоо хоногт гамшгаас хамгаалах өндөржүүлсэн бэлэн байдлын зэрэгт шилжүүлсэн. Хаваржилт хүндэрсэн аймаг, сумдад тусламж үзүүлэх Шуурхай бүлгүүдийг Засгийн газрын шийдвэрээр байгуулсан, сайд нар ахлан ажиллаж байна. Батлан хамгаалахын сайд Г.Сайханбаяраар ахлуулсан шуурхай бүлэг  Баянхонгор  аймгийн өвөлжилт хүндэрсэн сумдад ажиллаж байгаа. Шуурхай  бүлэг одоо Баянхонгор аймгийн Бууцагаан суманд ажиллаж байна. 
Бууцагаан сумын Онцгой байдлын  шуурхай штабын  нөхцөл байдалтай танилцлаа.
Тус суманд 1061 өрх,  792 малчин өрх байна.  Өвөлжилтийн бэлтгэл ажлын хүрээнд 
266 тн өвс, 15 тн тэжээл, 10 тн гар тэжээл, дарш, хужир таван тн,  460 тн  шүүг бэлтгэсэн байна. Өнөөдрийн байдлаар сумын нөөцөд 30 тн өвстэй. Нөөц нэмэгдүүлэхээр аймгийн нөөцөөс 1000 боодол өвс татсан. Сумын давсан орлого 50 сая  төгрөгөөр өвс тэжээлийн  нөөц бүрдүүлэхээр Сэлэнгэ аймгаас тээвэрлэх арга хэмжээг авч  байна. Мөн гидротоник тэжээл  бэлтгэх арга хэмжээг зохион байгуулж байгаа аж. Мөн 160 илгээлтийн эзэн хөтөлбөр хэрэгжүүлэх,  малчдад зориулсан аян өрнүүлж эхэлжээ.Онцгой байдлын албанд туулах чадвар сайтай ачааны автомашин  нэг,  фургон гурав,  унагалдай трактор хоёр байна.
Мөн тулгамдсан хэд хэдэн асуудлыг танилцууллаа. Малчдын санхүүгийн орлого тааруу байна. Мөн ЗДТГ болон ЭМТ-д  туулах чадвар сайтай автомашин хэрэгтэй байгааг уламжиллаа.
Малын тэжээл өвсний дутагдалд орсон 240 өрх байна.
Цаашид хүйтний эрч нэмэгдэж цас орвол хүндрэх нөхцөл байдалтай байгааг хэллээ.
Шуурхай бүлэг мэдээллийн дагуу  холбогдох асуудлуудыг шийдвэрлэж танилцууллаа. Тодруулбал, Улсаас  200 тн өвс үнэгүй өгөх шийдвэр гарсан. Үүнийг өвөлжилт хүндэрсэн аймагт  ахиу хуваарилна гэв. Аймгийн ЗДТГ-аас Бууцагаан  суманд 30 сая төгрөгийн зээл олгохоор боллоо. Мөн сумын ИТХ-ыг   яаралтай горимоор хуралдуулж,  тодорхой  шийдвэрүүдийг гаргахыг хүслээ. Сумын хүрээнд нэн яаралтай биш зардлуудыг танаж ажиллах боломжтой гэлээ. Түүнчлэн аймгаас нэг том шатахууныг багийн дарга нарт хувааж өгөхөөр шийдлээ.  Мөн тус сумаас гурван машины хүсэлт тавьсаныг ирэх долоо хоногийн  Засгийн газрын хуралдаанаар уламжилна гэлээ.
Эх сурвалж: www.polit.mn