Т.САЙХАН

УИХ-ын чуулганы нэгдсэн хуралдаанаар Хөрөнгө оруулалтын тухай хуулийн шинэчилсэн найруулгын төслийг  хэлэлцэж байна. Хэлэлцэж буй асуудалтай холбоотой гишүүд асуулт асууж, хариулт авлаа. 

УИХ-ын гишүүн Б.Баттөмөр: -Хөрөнгө оруулалтын хуулийг дэмжиж байна. Гэхдээ бид энд бусдын муу муухайг гайхаад байх хэрэггүй. 30 жилийн хугацаан дахь ханшийн уналт, инфляц, өвчлөл, утаа түгжрэл, гадаад өр гээд магадгүй муулаад байгаа газруудаасаа дор орчихсон яваа.   Монгол Улс бол хаалттай биш нээлттэй улс. Хэн ч орж ирээд юу ч хийж болно.  Бид 1992 онд ардчилал гээд бөмбөлөг хөөргөөд тэрийгээ тойроод гүйж байх хооронд нэг нөхөр орж ирээд Монголын 60 илэрцтэй лицензийг аваад явчихсан.  Тэрний нэг нь Оюутолгой.  "Магма копер" компани авч яваад манай лецинзийг "Би Эйч Би"-д худалдсан.  "Би Эйч Би"  Фрийландад худалдсан тэгээд цаашаа бас зараад манай Оюутолгойн хувь заяа наймааны хошин морь шиг яваад дууссан.  Энэ жил Монгол Улсын төсөвт 760 тэрбум төгрөг нийлүүлнэ.  Манай нийт төсөв 27 их наяд төгрөг. Үүнтэй харьцуулахад Оюутолгой 2.7 хувийг л бүрдүүлж байна.  Энэ том төсөл. Энэ их баялагтай харьцуулахад харамсалтай тоо. 2023 онд болсон эдийн засгийн форумын үеэр Риотинтогийн ТУЗ-ийн дарга Оюутолгойн ашиг Монголын ард түмний хүссэн хүлээлтэд хүрээгүй гэж хэлээд зогсож байсныг би санаж байна.  Ер нь бол нэг буруу хийсэн гэрээ цаашид жишиг болоод явчихдаг.  Тиймээс цаашид бид Хөрөнгө оруулалтыг авахдаа нэн тэргүүнд Монгол Улсын эрх ашиг, Монголын ард түмний эрх ашгийг нэгдүгээрт тавих хэрэгтэй.  Ийм жишиг Казахстанаас эхлээд байна.  Харин бидэн алга байна.  Яагаад гадаадын хөрөнгө оруулагчид маань биднээс айчихав.  5300 аж  ахуй нэгж яагаад татан буугдчихав.  Яагаад нийт аж ахуй нэгжийн 3.7-хон хувь нь гадны хөрөнгө оруулалттай байна вэ.  Үүний шалтгаан хуулиндаа байв уу. Энд нэг хариулт өгөөч?

Эдийн засаг, хөгжлийн сайд Ч.Хүрэлбаатар:- Хөрөнгө оруулагчдын гомдлыг Засгийн газар авч хэлэлцдэг болсон.  Эхлээд найман гомдол ирсэн бол 69 болж өссөн.   Хөрөнгө оруулагч нарын гомдлыг харахаар хуулийн байгууллагынхан нь нийлж байгаад хүний бизнесийг булаадаг.  Хуулиар шаардах ёсгүй зүйлүүдийг шаарддаг, нэхдэг.  Зарим лиценцийг хүчингүй болгуулж, өөрсдөө авдаг.  Хар тамхи аваачиж гэр оронд нуугаад илрүүлж хэрэг тохдог.  Хөрөнгийг нь дээрэмддэг.   Ийм зүйлүүд гараад байгаа учраас энэ улсад хөрөнгө оруулалт орж ирэхгүй байна.  Энэ бүгдийг засахаар энэ хуулийг оруулж ирж байгаа юм

Эх сурвалж:www.polit.mn