УИХ-ын чуулганы өнөөдрийн нэгдсэн хуралдаанаар “Эрдэнэс Тавантолгой ХК-ийн хувьцааны талаар авах зарим арга хэмжээний тухай” тогтоолын төслийг хэлэлцсэн. Компанийн 34 хувийг ард иргэддээ эзэмшүүлэх, 2012 оноос хойш төрсөн хүүхдэд хувьцаа олгох асуудлууд яригдаж байгаа билээ.

Чуулганы хуралдаанд УИХ-ын гишүүн Э.Батшугар “Эрдэнэс Тавантолгой” компанийн зах зээлийн үнэлгээний талаар хөндлөө. Тэрээр

“1072 хувьцааны үнэлгээний асуудал анхаарал татаж байна. Нэг сая төгрөг юм уу, яг хэдэн төгрөг юм гэдэг нь тодорхойгүй байна. Үүнийг зах зээлийн ханшаар нь зөв тооцохын тулд компанийн үнэлгээг хийлгэх хэрэгтэй. 2011 онд “Жи Пи Морган”-д ажиллаж байхдаа Тавантолгойн төсөл дээр тооцоолол хийж байсан юм. Тухайн үед бас IPO гаргах асуудал яригдаад манай баг 9 тэрбум ам.доллараар үнэлж байсан. Тэгвэл өнөөдөр 60-80 сая тонн нүүрс олборлодог, 300-400 сая ам.долларын цэвэр ашигтай компанийн зах зээлийн үнэлгээ нь 10-30 тэрбум ам.доллар байх ёстой. Дунджаар 15 тэрбум ам.доллар гэж бодоход 34 хувь нь 5.1 тэрбум. Үүнийг 3.4 сая хүнд хуваахаар 1500 ам.доллар болж байна. Өөрөөр хэлбэл, 1072 хувьцааны өнөөдрийн бодит ханш 5 сая төгрөг хүрэхээр харагдаж байна. Энэхүү бодит ханшид хүргэхийн тулд компанийн “IPO”-г гаргах хэрэгтэй. Өмнө нь ч энэ талаар олон удаа хэлж байсан. Компанийн үнэлгээг олон улсыг хөндлөнгийн мэргэжлийн байгууллагаар хийлгэх ёстой. Аудитын компани биш хөрөнгө оруулалтын банкирууд илүү зөв аргачлалаар хийдэг” гэсэн юм. Харин ажлын хэсэг анх ордын нөөцтэй уялдуулан үнэлгээг тогтоож байснаас хойш шинээр үнэлүүлээгүй гэж хариулсан юм.