УИХ-ын дарга Г.Занданшатарын санаачлагаар “Татварын цогц шинэчлэл” хэлэлцүүлгийг өнөөдөр МҮХАҮТ-д зохион байгуулж, татварын асуудлаар бизнес эрхлэгчдийн санал бодлыг сонслоо. МҮХАҮТ-аас 2023 оны судалгааг танилцуулахад өнөөдөр бизнес эрхлэгчдэд зээлийн хүү, татвар, төрийн байгууллагын хүнд суртал гэсэн гурван асуудал хамгийн их хүндрэлтэй байгааг хэлж байна.

• Энэ үеэр УИХ-ын гишүүн Э.Батшугар “Хөгжсөн эдийн засагтай улс орнуудад татварын дундаж түвшин 30 хувь байхад манайд зарим тохиолдолд 28 хувьд хүрч, ижил түвшинд очсон байгаа нь сүүлийн 30 жилд татварын бодлогыг зөвхөн төсвийн орлого бүрдүүлэхэд чиглүүлж ирсэнтэй холбоотой. Татварын бодлого нь төсөв бүрдүүлэх бус аж үйлдвэр, мэдээллийн технологи зэрэг орчин цагийн тэргүүлэх салбаруудад бизнес эрхлэгчдээ дэмжиж, эдийн засгаа тэлэхэд чиглэх ёстой. Тиймээс төсөв, мөнгөний бодлогыг татварын шинэчлэлтэй уялдаатай хэрэгжүүлэх чиглэлийг УИХ баримтална.

Харин энэ цаг үед хүнд суртлыг  бүрэн халах хамгийн оновчтой шийдэл нь технологи юм. Инновац, цахим бодлогын байнгын хорооноос тун удахгүй УИХ-ын чуулганы эцсийн хэлэлцүүлэгт бэлтгэж буй цахим шилжилтийн 120 хуулийн нэмэлт, өөрчлөлтөөр компани байгуулах, зөвшөөрөл авах зэрэг бизнес эрхлэгчдийн төрөөс авдаг олон үйлчилгээг бүрэн цахимжуулах боломж нээгдэж байгаа” гэж онцлов.

Мөн энэ үеэр Монгол Улсын Их Хурал татварын реформыг нийтийн санхүүгийн шинэчлэл буюу төсвийн үргүй зардал,төрийн өмчит компаниудын ашиггүй үйл ажиллагаа, мөн хуулиас давсан дүрэм журмаар шимтгэл, татвар авдаг асуудлыг зогсоохоос эхэлнэ гэдгийг УИХ-ын дарга мэдэгдлээ.