Т.САЙХАН

Байгаль орчин, хүнс хөдөө аж ахуйн байнгын хорооны өнөөдрийн хуралдаанаар Гэрийн тэжээвэр амьтны тухай хуулийн анхны хэлэлцүүлгийг явуулав. Хуулийн төслийг УИХ-ын гишүүн Б.Энхбаяр нар анх өргөн барьсан бол одоогийн төслийг санаачлагчаар Хууль зүйн байнгын хорооны дарга Д.Цогтбаатар ажиллаж байна. 

Хуулийн төслийн 10 дугаар зүйлд   нохой, муурын нэгдсэн бүртгэлийн сан бүрдүүлэх, бүртгэл хөтлөх журамд бичил чип суулгасан нохой, муурын асран хамгаалагчийн бүртгэл, нохой, муур үржүүлэгч болон түр байрлуулан асрамжлах газрын бүртгэл, нохой, муурын асран хамгаалагчийн сургалт явуулах хуулийн этгээдийн бүртгэл, алдагдсан нохой, муурын бүртгэл зэрэг асуудлыг тусгах”  гэсэн агуулгатай 10.7 дахь хэсэг, “Баг, хорооны Засаг дарга, нутаг дэвсгэр хариуцсан цагдаагийн байгууллага, мал эмнэлгийн үйлчилгээний нэгж нь бичил чип унших төхөөрөмжтэй байна” гэсэн 10.8 дахь хэсэг нэмэх санал гаргасныг хуралдаанд оролцсон гишүүдийн олонх дэмжсэн. Мөн төслийн 23 дугаар зүйлд “Нохой, муур үржүүлэх үйл ажиллагаа эрхлэх зөвшөөрөл дуусгавар болсон тохиолдолд зөвшөөрөл эзэмшиж байсан этгээд нохой, муур үржүүлэх үйл ажиллагааг нэн даруй зогсоож, хуулийн этгээдийн нэр дээр бүртгэлтэй нохой, муурыг иргэн, эсхүл энэ хуульд заасан зөвшөөрөлтэй хуулийн этгээдэд шилжүүлнэ” гэсэн 23.2 дахь хэсэг нэмэх Ажлын хэсгийн саналыг хуралдаанд оролцсон гишүүдийн 54.5 хувь нь дэмжлээ.    

Мөн  нохой муурыг удмын сантай болгох асуудлаар хууль санаачлагчид зарчмын зөрүүтэй санал гаргав.  Энэ нь ургийн бичиг шиг хөтөлж явах агуулгатай баримт бичиг юм.  Тэгвэл энэ асуудлаар УИХ-ын гишүүн С.Чинзориг "Та нар өөрсдийн ургийн бичгээ сайн хөтөлдөг юм уу.  Зарим нь өвөг эцгээ ч мэдэхгүй байгаадаа " хэмээн хуралдааныг орхиж гарав. 

Эх сурвалж:www.polit.mn