Т.САЙХАН
“Тээврийн долоо хоног” чуулган үргэлжилж байна. Энэхүү чуулганд Монгол Улсын сайд, Боомтын сэргэлтийн Үндэсний хорооны дарга Б.Тулга хилийн боомтуудын дэд бүтцийн бүтээн байгуулалтын явцыг танилцуулсан. Түүний танилцуулгаас эшлэн хүргэж байна.
-Монгол Улсын нийт 39 боомтын 27 автозамын, зургаа нь төмөр замын, зургаа нь агаарынх. Боомтуудын дэд бүтцийг хөгжүүлж хүчин чадлыг нэмэгдүүлснээр 2024 он гэхэд Монгол Улсын нийт экспорт 14 тэрбум ам.долларт хүргэх бол 2025-2028 онд 17, 2029-2030 онд 20 тэрбум ам.долларт хүргэх зорилттой.
- Монгол Улсын экспорт гуравдугаар улиралд мөнгөн дүнгээр 14.3 тэрбум ам.доллар хүрэх төлөвтэй. Одоо улсын нийт экспортын 85.3 хувь Гашуунсухайт, Замын-Үүд, Шивээхүрэн боомтуудад төвлөрч байгаа бол импортын ачааллын бараг 90 хувь Сүхбаатар, Замын-Үүд, Гашуунсухайт боомтод ногдож байна.
-Боомтын тухай хуулийг УИХ-ын энэ намрын чуулганаар, амжихгүй бол хаврын чуулганд оруулахаар бэлтгэж байна. 2012 онд Боомтын тухай хуулийг баталснаас хоёр жилийн дараа хүчингүй болгосон.
-Боомтын ерөнхий төлөвлөлтийг эдийн засгийн чөлөөт бүсүүд, аж үйлдвэрийн паркууд, хуурай боомтуудтай шууд уялдуулах ёстой. Монгол, Орос, Хятад улсын холбосон “Эдийн засгийн коридор” санаачилга, “Транзит Монгол” бодлоготой уялдуулах, эдийн засгийн коридор нь Монгол Улсад үр ашигтай байх талаас нь давхар бодолцож боомтуудын төлөвлөлтүүдийг хийх хэрэгтэй.
-Монгол Улс, БНХАУ 2030 оноос өмнө худалдааны эргэлтээ 20 тэрбум ам.долларт хүргэх зорилт дэвшүүлсэн. Тэгвэл хөрш хоёр улс хоорондоо 200 тэрбум ам.долларын худалдаа хийж байна. Үүний хэдэн хувийг транзитаар манай улс өөрийн нутгаар, боомтуудын дэд бүтэц, авто болон төмөр замаар дамжуулж явуулах талаар маш сайн тооцоолох учиртай.
- Монгол Улс гадаад худалдааны стратегийн бодлогыг тодорхойлж, боомтын дэд бүтцүүд, замуудаа төлөвлөх ёстой. Өнөөдөр Тянжины боомт дээр Монголын чингэлэг тээвэр ачаалж түгжрэл үүсээд байгаа шалтгаан нь манай улсад бий.
-Нэг цуваа галт тэрэг орж ирэхэд Улаанбаатар хотод өдрийн дотор 50 вагоныг логистикийн төвүүдэд тарааж буулгах техникийн, дэд бүтцийн нөхцөл, чадамж байхгүй. Тиймээс “Боомтын сэргэлт”-ийн хүрээнд хуурай боомтууд, төвлөрсөн хот сууринд ачаа тээврийн логистикийн терминал, төвүүдийг байгуулах ажлыг хувийн хэвшилтэй хамтран хэрэгжүүлнэ.
-Монгол Улс түүхэн шийдвэрийг гаргаж Алтанбулаг-Замын Үүд боомтыг холбосон төмөр болон авто замын транзит коридорыг зарласан. Авто замын коридорын хувьд Алтанбулаг-Дархан хот болоод Налайх-Замын Үүд хүртэл дөрвөн эгнээ хоёр урсгалтай замыг концессоор байгуулна.
-Тэгвэл Замын-Үүдийн авто замын боомтыг 24 цагаар ажиллуулах шийдвэрийг БНХАУ-ын боомтын удирдлагуудтай тохиролцож, арванхоёрдугаар 1-нээс туршилтын үйл ажиллагааг эхлүүлэх хэлцэлд хүрсэн. Хятад улс 315 боомттой.
-Монгол Улс одоогоор БНХАУ-тай ганцхан төмөр замын боомтоор холбогдож байна. 2024 онд шинээр 2 боомтыг төмөр замаар холбож чадах юм бол дараагийн ээлжинд төмөр замаар холбогдох потенциалтай боомт нь Ханги-Мандал.
Эх сурвалж:www.polit.mn