С.САРУУЛ

Монгол Улсын Зэвсэгт хүчин, Япон улсын Өөрийгөө хамгаалах хүчний хамтарсан “Зам-2023” сургуулийн гуравдугаар шатны сургалт, дадлага тун удахгүй Япон Улсад зохион байгуулагдах гэж байна. Хоёр улсын инженерийн цэргийнхний хамтарсан энэхүү сургууль нь энэ жил гурван үе шаттайгаар зохион байгуулагдаж буй бөгөөд нэг, хоёрдугаар шат нь онол, дадлагын хэлбэрээр явагдсан юм. “Зам-2023” сургуулийн гуравдугаар шатанд оролцох бүрэлдэхүүнийг өнөөдөр Зэвсэгт хүчний Хуурай замын цэргийн командлагч бригадын генерал Ч.Цогтжаргал хүлээн авч уулзаж, амжилт хүсэв.

Тэрээр “Зам” хамтарсан сургууль нь хамгийн үр өгөөжтэй, инженерийн цэргийн чадавхыг нэмэгдүүлэхэд жинтэй хувь нэмэр оруулж байгааг дурдаад Япон Улсын техник технологийн хөгжил ялангуяа цэргийнхний бүтээн байгуулалт, ажлын арга барил, сахилга хариуцлага, үр бүтээмжтэй байдлыг нь ажил албандаа хэрэгжүүлэхэд онцгой анхаарахыг захилаа. Японы инженерийн цэргийнхний хөгжил дэвшил, орчин үеийн шийдэл, гарцыг нь хараад бахархаж ирээд мартах бус өөрсдийн санал санаачилгатайгаа уялдуулж Зэвсэгт хүчиндээ өрнүүлэх үүрэг хариуцлага өмнө нь байгааг ч тодотгов.

Япон Улсад 10 хоногийн хугацаатай явагдах тус сургалтад Монгол Улсын Зэвсэгт хүчний 5 анги байгууллагын 14 офицер, ахлагч хамрагдаж байгаа бөгөөд тэдний олонх нь “Зам” сургалтад 1-5 удаа оролцсон туршлагатай алба хаагчид байна.

Монгол талын сургуулийн удирдагч, ХЗЦК-ын Инженерийн дарга дэд хурандаа Г.Мөнхбатын өгсөн мэдээллээр Япон Улсад “Зам” сургууль явагдаж байгаа нь анхных биш бөгөөд өмнө нь хоёр удаа жил дараалан зохион байгуулагдаж байжээ. Сургалт онол, дадлага хосолсон хэлбэрээр Япон Улсын инженерийн цэргийн анги, Цэргийн их сургуулийг түшиглэн зохион байгуулагдах юм байна.

Эх сурвалж: www.polit.mn