НҮБ-ын Ерөнхий Ассамблейн 78 дугаар чуулганы Ерөнхий санал шүүмжлэлд оролцож байгаа Ерөнхийлөгч У.Хүрэлсүх Швейцарын Холбооны Улсын Холбооны Ерөнхийлөгч Ален Берсе болон Бүгд Найрамдах Казахстан Улсын ерөнхийлөгч К.Токаев нартай албан ёсны уулзалт хийлээ.

Монгол-Швейцарын холбооны улсын хооронд дипломат харилцаа тогтоосны 60 жилийн ой ирэх онд тохионо. Тиймээс ч талууд харилцаа, хамтын ажиллагаагаа өргөжүүлэн хөгжүүлэх, тэгш ойг тэмдэглэн өнгөрүүлэх болон өнөөгийн олон улсын харилцааны асуудлаар санал солилцлоо. Ерөнхийлөгч У.Хүрэлсүх Швейцарийн холбооны улсын холбооны улсын тэргүүнийг ирэх онд Монголд айлчлахыг урьсан бөгөөд Ерөнхийлөгч Ален Берсе урилгыг талархан хүлээн авч байгаагаа илэрхийлэв. Тэрбээр геополитикийн амаргүй нөхцөл байдал нь улс орнуудын олон талт хамтын ажиллагаанд бэрхшээл үүсгэж буйг тэмдэглэв.

Үүний дараа төрийн тэргүүн Бүгд Найрамдах Казахстан улсын ерөнхийлөгч Касым Жомарт Токаевтай уулзлаа. Монгол Улсын Ерөнхийлөгч У.Хүрэлсүх түүх, оюун санаа, өв соёл, уламжлалын хэлхээ холбоотой тус улстай найрсаг харилцаа, хамтын ажиллагааг өргөжүүлэн хөгжүүлэхийн төлөө байгаагаа онцлон тэмдэглэв.

Монгол, Казахстаны хувьд соёл, уламжлалаас гадна Төв Азийн бүс нутагт зэрэгцэн оршдог, далайд гарцгүй, хөгжиж буй орон зэрэг олон талаар ижил төстэй зүйл бий. Тиймээс хөгжлийн туршлагаа харилцан хуваалцаж, худалдаа, эдийн засгийн хамтын ажиллагааг улам бүр хөгжүүлэх өргөн боломж байгааг хоёр ерөнхийлөгч харилцан илэрхийлэв. Ялангуяа сүүлийн жилүүдэд Монгол Казахстаны эдийн засгийн харилцааг улам өргөжиж байгаа. Тиймээс ч экспорт, импортын бараа бүтээгдэхүүний нэр төрлийг төрөлжүүлж, улмаар худалдааны эргэлтийг нэмэгдүүлэх, “Монгол, Казахстаны худалдаа, эдийн засгийн хамтын ажиллагааг 2023-2025 онд эрчимжүүлэх замын зураглал” болон бизнесийн зөвлөлийг ойрын хугацаанд байгуулах нь зүйтэй гэдэгт Ерөнхийлөгч У.Хүрэлсүх, К.Токаев нар санал нэгдлээ. Мөн цаашид  томоохон төсөл, хөтөлбөр хэрэгжүүлэх, уул уурхайн салбар дахь туршлагаа солилцох, бүс нутаг, олон улсын тавцан дахь хамтын ажиллагаагаа өргөжүүлэх болон бусад харилцан сонирхсон асуудлаар ярилцав.

Бүгд Найрамдах Казахстан Улсын Ерөнхийлөгч Касым-Жомарт Токаев 2024 онд Монгол Улсад төрийн айлчлал хийхээр төлөвлөжээ.