Ц.МЯГМАРБАЯР

Манай эдийн засгийн сэргэлт цаашид үргэлжилж ДНБ-ий өсөлт ойрын хугацаанд хэвээр хадгалагдахаар байгааг Азийн хөгжлийн банкны шинэ тайланд онцолж байна.  Энэ оны дөрөвдүгээр сард эдийн засгийн өсөлтийг 5.4 хувь байхаар төсөөлсөн нь бага зэрэг өсч энэ есдүгээр сард  5.7 хувь байна. Эдийн засгийн өсөлтийг гадаад эрэлт, экспортын сэргэлт, дотоод эрэлт  дэмжихээр байгаа хэдий ч, өндөр инфляц, түүний эсрэг мөнгөний хатуу бодлого, дотоод санхүүжилтын нөхцөл чангарсан зэрэг нь хязгаарлаж одоо инфляц 16.4 хувьтай байна. Нийлүүлэлт, эрэлтийн  шалтгаант инфляцтай тэмцэхийн тулд хөдөлмөрийн нийлүүлэлтийн зах зээлийг өсгөх  ажил эрхэлтийг нэмэгдүүлэх шаардлагатай гэж АХБ-ны Монгол Улс дахь суурин төлөөлөгчийн газрын ахлах эдийн засагч С.Болд онцолж байна. Тэрбээр “ Манай улс 2020 онд нэг сая 250 мянган  ажилтантай байсан бол 2023 онд энэ тоо нэг сая  160 мянга болж буурсан байна. Их хямралын  дараах 2008 оны  ажил эрхлэлтийн түвшинд хүрэхгүй байна. Тэр үед  ажил эрхэлтийн түвшин 62-63 хувьтай  байсан бол энэ онд 52 хувьтай байна” гэлээ.  Ирэх онд ДНБ-ий өсөлтийг уул уурхайн салбарын өсөлт, түүний тээвэр агуулах,үйлчилгээний бусад үйл ажиллагаанд эерэг нөлөөлөл болон хувийн хэвшлийн зээл дэмжихээр байгаа аж. Төлбөрийн тэнцэл сайжирч гадаад валютын улсын нөөц 3.7-3.9 тэрбум ам.долларт  хүрч тогтворжсон.Цаашид инфляцыг бууруулж, тогтвортой түвшинд  хадгалах, ажил эрхлэлтийг нэмэгдүүлэх, татварын бааз суурийг тэлэх, төсвийн зардлыг эрэмбэлж, хумих, хуримтлалыг нэмэгдүүлэх хэрэгтэй байгааг зөвлөж байна.

Эх сурвалж: www.polit.mn