• Зууны мэдээ сонин онлайн захиалга

Улаанбаатар-Дархан чиглэлийн автозамын ажлыг чанаргүй гүйцэтгэсэн “Чайна Жео-Инженеринг Корпораци” компанийг хар жагсаалтад оруулахаар болов

П.АМГАЛАН

Ерөнхий сайд Л.Оюун-Эрдэнийн орон нутаг дахь томилолт Дархан-Уул аймагт үргэлжилж байна. Тэрбээр Улаанбаатар-Дархан чиглэлийн 204.11 км авто замын өргөтгөл, шинэчлэлийн ажлын явцтай танилцлаа. Ерөнхий сайд тус замын ажлын явцтай гуравдахь удаагаа танилцаж байна. Улаанбаатар-Дархан чиглэлийн автозамыг дөрвөн эгнээ бүхий хатуу хучилттай автозам болгон өргөтгөн шинэчилж буй. Хоёр эгнээ хуучин автозамыг Азийн хөгжлийн банкны санхүүжилтээр өргөтгөн шинэчилж, Европын сэргээн босголт, хөрөнгө оруулалтын банкны санхүүжилтээр нэмж хоёр эгнээ автозам барьж байна. Азийн хөгжлийн банкны санхүүжилтээр хийгдэж буй таван багц ажлаас нийт 113.53 км авто замын хөдөлгөөнийг 2021 оны долдугаар сарын 16-нд нээсэн. Өнөөдрийн байдлаар эдгээр багц ажилд 300 орчим инженер, техникийн ажилчид, 128 техник, тоног төхөөрөмж ажиллаж, барилгын ажлын гүйцэтгэл 87 хувьтай байна.  Европын сэргээн босголт, хөрөнгө оруулалтын банкны санхүүжилтээр хийгдэж буй хоёр эгнээ автозамаас 2022 онд багц нэг болон дөрөвдүгээр хэсгийн суурь асфальтбетон хучилтын ажил бүрэн дуусаж тээврийн хэрэгслийн хөдөлгөөнийг 2022 оны  аравдугаар сарын 30-нд нээсэн.

Өнөөдрийн байдлаар өнгө хучилт хийгдэж байгаа бөгөөд 2023 онд дөрвөн эгнээ хатуу хучилттай авто замыг нээхээр төлөвлөн ажиллаж байна. Төслийн гүйцэтгэл 67.5 хувьтай байна. Ерөнхий сайд Л.Оюун-Эрдэнэ Улаанбаатар-Дархан чиглэлийн автозамын ажлын явцтай танилцах үеэрээ замын ажлыг чанартай, шуурхай гүйцэтгэж, энэ онд багтаан бүрэн дуусгах, ажлаа чанаргүй гүйцэтгэсэн “Чайна Жео-Инженеринг Корпораци” компанийг хар жагсаалтад оруулж, төрөөс зарлаж буй ажил гүйцэтгэлийн тендерт дахин оруулахгүй байхыг үүрэг болголоо. 

Эх сурвалж:www.polit.mn

АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
иргэн
энэ ондоо багтаагаад ашиглалтад орох болов уу? уг нь 200хан км зам шүү, 10-р сард ашиглалтад орно гэж байсан, одоо болохоор энэ ондоо багтаад гэж, 12-р сар дөхөөд ирэхээр ирэх оны эхээр дуусгана гэх байх, тэр нь дуусахаар сонгуулийн өмнө, дараа нь наадмын өмнө, дараа нь хичээл сургууль орохоос өмнө, 2024 ондоо багтаад гээд замын үлгэр дуусахгүй нь. Хугацаандаа ажлууд хийгдэнэ гэж ер байхгүй шүү монголд.
иргэн
энэ ондоо багтаагаад ашиглалтад орох болов уу? уг нь 200хан км зам шүү, 10-р сард ашиглалтад орно гэж байсан, одоо болохоор энэ ондоо багтаад гэж, 12-р сар дөхөөд ирэхээр ирэх оны эхээр дуусгана гэх байх, тэр нь дуусахаар сонгуулийн өмнө, дараа нь наадмын өмнө, дараа нь хичээл сургууль орохоос өмнө, 2024 ондоо багтаад гээд замын үлгэр дуусахгүй нь. Хугацаандаа ажлууд хийгдэнэ гэж ер байхгүй шүү монголд.