Т.САЙХАН

Улсын Ерөнхий Прокурорын Газраас  ХХААХҮ-ийн сайд асан Т.Бадамжунайд холбогдох хэргийн талаар тайлбар  өгчээ. Тайлбарт "Т.Бадамжунайд холбогдох хэрэгт яллах дүгнэлт үйлдэн шүүхэд шилжүүлээгүй. Түүнд холбогдох хэргийг Авлигатай Тэмцэх Газар(АТГ)-аас шүүхэд шилжүүлэх саналтайгаар Нийслэлийн Прокурорын Газар(НПГ)-т ирүүлсэн. Одоогоор НПГ-аас эрх мэдэл, албан тушаалын байдлаа урвуулан ашиглах, хахууль өгөх, мөнгө угаах гэмт хэрэгт холбогдуулан шалгаж байгаа" хэмээлээ. 

Энэ оны дөрөвдүгээр сард ХХААХҮ-ийн сайд асан Т.Бадамжунайг Филиппин улсад байхад нь авч ирэн Нийслэлийн прокурорын газраас эрх мэдэл, албан тушаалын байдлаа урвуулан ашиглах, хахууль өгөх, мөнгө угаах гэмт хэрэгт холбогдуулан яллагдагчаар татаж, цагдан хорьсон. Т.Бадамжунайг энэ оны дөрөвдүгээр сарын 7-ны өдрөөс одоог хүртэл үргэлжлүүлэн цагдан хорьж байна. Хамгийн сүүлд Прокурорын байгууллагаас түүнд авсан цагдан хорих таслан сэргийлэх арга хэмжээг сунгуулах тухай саналыг Сүхбаатар дүүргийн Эрүүгийн хэргийн анхан шатны шүүхэд энэ сарын 4-ний өдөр гаргасан юм.

Эх сурвалж:www.polit.mn