Н.Жаргалмаа

Баяр наадам хаяанд ирсэн энэ цагт УИХ-ын хаврын чуулган хаалтаа хийж байна. Эдийн засаг, хөгжлийн яамнаас боловсруулсан Хөрөнгө оруулалтын тухай хуулийг дагалдан газрын тухай хуульд өөрчлөлт орох тухай яриа гараад буй. Үүний эсрэг С.Ганбаатар гишүүн, НИТХ-ын төлөөлөгч Т.Батцогт нар болон иргэдийн төлөөлөгчид Үндэсний мэдээллийн төв мэдэгдэл хийлээ.

 Газрын тухай хуулийн өөрчлөлт нь ердөө ганц өгүүлбэрийг өөрчилж байгаа гэх ч үндсэндээ маш том асуудал хөндөгдөж байна. Тухайлбал гадаадын компаниуд газар нутгийн эзэмших зөвшөөрөл нь хуулийн дагуу 5, 5 нийт 10 жилээр олгодог. Үүнийг 60, 40 нийт 100 хүртэлх жилээр эзэмших эрхийг олгохоор өөрчлөлтөд тусгажээ. Гэтэл иргэдэд 15-60 жилээр эзэмших эрхийг олгохоор заасан ч газрын захирамж ихэнхдээ 15 жилээр гарсаар байгаа аж. Үүнд ямар нэг өөрчлөлт тусгаагүй хэвээр үлдээжээ.

“Миний нутгийн газар шорооноос Бурхан гуйсан ч бүү өг” хэмээн бидний өвөг дээдэс сургаж, эх нутаг газар нутгийнхаа төлөө тэмцсээр ирсэн. ОГазар нутаг бол улсын үндэс билээ” хэмээн С.Ганбаатар гишүүн хэлэв. Мөн тэрбээр “Гадны хөрөнгө оруулалт шинжлэх ухаан ололт амжилтыг бид үгүйсгээгүй. Мэдээж боломжтой бүх нөхцлөөр хамтран ажиллаж болно. Гэхдээ газар нутгаа өгч яавч болохгүй. Бид үр хүүхэд ирээдүй хойч үедээ эх орон газар нутгаа үлдээх ариун үүрэгтэй” хэмээн уриалав.

Харин АН-ын ИТХ-н төлөөлөгч Т.Батцогт “Эрх баригчид жил бүр нийтээр тэмдэглэдэг баяр ёслолыг далимдуулан хулгайгаар хууль баталж байгааг бид таслан зогсоох цаг ирсэн. Өнөөдөр Монгол оронд хөрөнгө оруулалт огтоос байхгүй зүйл биш. Энэ хуулийн өөрчлөлт нь цэвэр луйврын шинжтэй. Гэвч бид үүнийг харсаар байж чимээгүй өнгөрөөж болохгүй” гэв.

Эх сурвалж: Үндэсний мэдээллийн төв