Б.Нандин

Ерөнхийлөгчийн ивээл дор, Гадаад харилцааны сайд Б.Батцэцэгийн санаачлагаар Монгол Улсад анх удаа Гадаад хэргийн эмэгтэй сайд нарын уулзалтыг зохион байгуулж буй. Тэгвэл энэхүү уулзалтад оролцож буй Гадаад хэргийн сайд нар хамтран "Улаанбаатарын тунхаглал"-ыг гаргалаа. 

Төлөөлөгчид хүнсний аюулгүй байдал, уур амьсгалын өөрчлөлт болон олон улсын энх тайван аюулгүй байдал гэсэн гурван үндсэн сэдвээр салбар хуралдаанд оролцсон. Тиймээс "Улаанбаатарын тунхаглал"-ын гол үзэл баримтлал нь жендэрийн тэгш байдлыг хангах, эмэгтэйчүүд, охидын эрх, эрх чөлөөг хамгаалах асуудлыг бодлого, үйл ажиллагаандаа тусган хэрэгжүүлэх замаар энх тайван, аюулгүй байдлыг хангах үйлсэд хувь нэмэр оруулах, уур амьсгалын өөрчлөлттэй тэмцэх, уур амьсгалын өөрчлөлтийн эмэгтэйчүүд, охидын сурч боловсрох, эдийн засгийн хувьд чадавхжих зэрэг үзүүлж буй сөрөг нөлөөг бууруулах, хүнсний аюулгүй байдлыг хангах зэрэг өргөн хүрээний асуудалд улс орнууд үүрэг амлалт, хамтын ажиллагааг тодорхойлохоор тусгажээ. 

Энэхүү уулзалтыг ХБНГУ, БНФУ хамтран зохион байгуулсан бөгөөд ХБНГУ-ын Гадаад хэргийн сайд А.Бербок, Франц Улсын Гадаад хэргийн сайд К.Колонна нар биечлэн оролцов. Түүнчлэн Индонез Улсын Гадаад хэргийн сайд Ретно Л.П.Марсуди, Лихтенштайн Улсын Гадаад хэрэг, боловсрол, спортын сайд Д.Хаслер, Өмнөд Африкийн Олон улсын харилцаа, хамтын ажиллагааны сайд Н.Пандор, Австралийн Холбооны Улсын Жендерийн тэгш байдлын асуудал эрхэлсэн Элчин сайд С.Кэмпбэлл, Бүгд Найрамдах Мозамбик Улсын Элчин сайд Ана Немба Уаине болон Уур амьсгалын ногоон сангийн Гадаад хэргийн асуудал эрхэлсэн захирал С.Оюун, Олон улсын худалдааны төвийн Гүйцэтгэх захирал П.Коук-Хэмилтон, Европын аюулгүй байдал хамтын ажиллагааны байгууллагын Ерөнхий нарийн бичгийн дарга Х.Шмид нар хүрэлцэн иржээ.