Казахстаны нийслэл Астана хотноо казахын Ард түмний ассамблей эхэллээ. 1995 оноос тухайн үеийн Ерөнхийлөгч Н.Назарбаевын санаачлагаар анхны хуралдааныг зохион байгуулж байсан бол 32 дахь удаагийнх энэ жил болж байна.
Сүүлийн жилүүдэд Төв Азидаа хөгжлөөрөө тэргүүлэх болсон тус улсын хувьд олон ястны өлгий нутаг хэмээн бахархдаг. Одоогоор БНКУ-д 130 гаруй үндэстэн ястан, үндэсний цөөнхийн төлөөлөл ажиллаж амьдарч байна. Соёл уламжлал төстэй, нэгэн улсын нэрийн дор амьдарч байгаагийн хувьд үндэстэн ястнуудын үгийг сонсох, төрийн төлөөллийн байгууллагуудад тэдний төлөөллийг багтааж дуу хоолойг хүргэх нь ассамблейн гол ач холбогдол юм.
Тус улсын ерөнхийлөгч К.Токаев ассемблейг нээж хэлсэн үгэндээ “Өнөөдөр бол бидний эв нэгдлийн баяр, бэлгэдэлт өдөр юм” хэмээн онцлов. Тэрээр “Казахстан улс нийгэм, улс төрийн томоохон өөрчлөлт хийж байгаа түүхэн цаг үе тохиож байна. Энэ түүхэн өөрчлөлтүүдийг ард түмний дэмжлэггүйгээр бид хийж чадахгүй. Тиймээс ч улс орны өнцөг булан бүрт байгаа иргэн бүрийн хүчин чармайлт, дэмжлэг бидэнд маш чухал юм. Бид дотооддоо ардчилалтай, гадаадад нээлттэй нэгдмэл улс орныг бий болгохоор зорьж байна. Олон ястны өлгий нутаг гэж бахархахын зэрэгцээ эв найртай, нэгдмэл чанартай, иргэн бүрт ээлтэй, найрсаг улс байгуулахын төлөө энэхүү түүхэн өөрчлөлтийг хийж байна” гэсэн юм.
Өнгөрсөн жилээс эхэлсэн өөрчлөлт шинэчлэлтийн дүнд казахууд Үндсэн хуульдаа хэд хэдэн бодлогын өөрчлөлтүүдийг хийж чадсан байна. Тухайлбал, ерөнхийлөгчийн бүрэн эрхийн хугацааг хязгаарлаж, долоон жилээр нэг удаагийн хугацаатайгаар сонгох болсон нь дээрх томоохон өөрчлөлтийн нэг юм. Мөн Ерөнхийлөгчийн болон парламентын хоёр шатны сонгуулийг шинэ системээр явуулаад удаагүй байна. БНКУ-ын хувьд парламентын дээд танхим болох сенат, доод танхим буюу мажилисын гишүүдийг ард түмнээс сонгодог. Хуульд орсон томоохон өөрчлөлтийн хүрээнд 30 хувь мажоритар, 70 хувь пропорциональ гэсэн холимог тогтолцоогоор парламентын сонгууль явуулжээ. Үүний үр дүнд одоогоор улс төрийн зургаан нам парламентад төлөөлөлтэй болсон байна. Мөн шинэ байгуулагдсан парламентын дээд танхимд Ард түмний ассамблейгээс таван гишүүн сонгогджээ.
Эх сурвалж: www.polit.mn
