Төмөрбаатарын БАТСАЙХАН
МАН-ын дэргэдэх НАМЭХ-ны ээлжит бус Их хурал болж, ерөнхийлөгчөөрөө УИХ-ын гишүүн, Боомтын асуудал эрхэлсэн сайд Х.Булгантуяаг сонголоо. Мөн тус хуралдаанаас НАМЭХ гэх нэрийг Монголын Социал демократ эмэгтэйчүүдийн холбоо болгон өөрчлөв. Тэгэхээр МАН-ын эмэгтэйчүүдийн холбоо шинэ нэр, үзэл баримтлалтайгаар нэгэн үеэ эхлүүлж, энэ үеийн хөгжлийг тодорхойлох хүнээр Х.Булгантуяа сонгогдов. Эрх баригч намын эмэгтэйчүүдийн холбоо мэдээж улс төрд хүчтэй, нөлөөтэй байх нь ойлгомжтой. Намын дүрмэндээ аливаа албан тушаалд эмэгтэйчүүдийн тодорхой хувийг багтаана гээд квот заагаад өгчихсөн. Энэ зарчмын дагуу Засгийн газрын бүрэлдэхүүн, аливаа удирдах албан тушаал болон Удирдах зөвлөлд ч эмэгтэйчүүдийн төлөөллийг багтааж ирсэн. Тиймээс МАН доторх эмэгтэйчүүдийн холбоо ирэх сонгуульд ч хэн хэнийг дэвшүүлэх вэ гэдгийг шийднэ. Үүнд, Монголын Социал демократ эмэгтэйчүүдийн холбооны ерөнхийлөгч Х.Булгантуяа чухал үүрэг гүйцэтгэхээр болж байна.
Мөн түүний хувьд УИХ-ын гишүүн, Засгийн газрын гишүүн, МСДЭХ-ны ерөнхийлөгч гэсэн гурван “давхар дээл”-тэй ажиллах нь. Тэрбээр 2020 оны УИХ-ын сонгуулиар Баянзүрх дүүрэгт нэр дэвшиж, сонгогдсон. Одоогийн Ерөнхийлөгч, тухайн үеийн МАН-ын дарга У.Хүрэлсүх 2020 оны сонгуульд шинэ залуу төлөөллийг нэлээд дэмжиж ажилласан. Х.Булгантуяа түүний багт багтаж, парламентын сонгуульд нэр дэвшиж, анх удаагаа УИХ-ын гишүүнээр сонгогдсон байдаг. УИХ-ын гишүүнээр сонгогдсоныхоо дараагаар тэрбээр МАН-ын бүлгийн дэд даргаар мөн нэг хэсэг ажилласан билээ.
Түүний дараахан 2022 онд Үндсэн хуулийн өөрчлөлтийн дагуу Засгийн газрын бүтэц өөрчлөгдөв. Засгийн газрын өдөр тутмын ажлыг шуурхай болгох, тулгамдаж байгаа зарим асуудлыг шийдвэрлэх үүднээс асуудал эрхэлсэн гурван сайд томилсон. Түгжрэлийн асуудал эрхэлсэн сайдаар УИХ-ын гишүүн Ж.Сүхбаатар, Спорт, олимпизмын асуудал хариуцсан сайдаар Б.Бат-Эрдэнэ, Боомтын асуудал хариуцсан сайдаар Х.Булгантуяаг сонгож, томилсон.
Тухайн үед Боомтын асуудал эрхэлсэн сайдад олон хүний нэр яригдаж, улс төр хөшигний цаана яриа тохироо хийж байсан ч тэр дундаас Х.Булгантуяа шигшигдэн гарч, сайд болсон билээ. Ийнхүү тэрбээр одоогийн МАН-ын дарга Л.Оюун-Эрдэнийн тэргүүлсэн Засгийн газрын гурав дахь эмэгтэй сайд юм. Л.Оюун-Эрдэнийн Засгийн газраас “Шинэ сэргэлт”-ийн бодлогыг хэрэгжүүлж, боомтын сэргэлтийг тэргүүлэх зорилтоо болгон ажиллаж байна. Мөн олны анхаарлыг татсан нүүрсний хулгайн асуудал ч боомтын сэргэлттэй шууд холбоотой. Тэгэхээр Х.Булгантуяа сайдын эрхлэх асуудал нь энэ Засгийн газрын нэлээд чухал цэг нь болж байна.
Х.Булгантуяагийн хувьд МАН-ын эмэгтэйчүүд дундаа нэлээд өндөр боловсролтойд тооцогддог. Тэрбээр 1998 онд “Монгол Турк”-ийн хамтарсан гүнзгийрүүлсэн сургалттай ерөнхий боловсролын сургуулийг дүүргэж, 2006 онд БНХАУ-ын “Хуазонг” Шинжлэх ухаан технологийн их сургуулийг эдийн засагч мэргэжлээр төгсчээ. Улмаар 2008 онд АНУ-ын Иелийн их сургуульд эдийн засагч, олон улсын эдийн засаг, хөгжлийн эдийн засгийн чиглэлээр магистрын зэрэг хамгаалсан байна. Сургуулиа төгсөж ирээд хувийн хэвшил, бизнесийн байгууллагуудад нэлээд олон жил ажиллаж байгаад улс төрд оржээ.
Тухайлбал, 2006-2008 онд “Бүтээлч шийдлүүд” ХХК-д хөрөнгө оруулалтын зөвлөх, 2008-2010 онд Дэлхийн банкны төсөл, хөтөлбөрийн зөвлөх, 2010-2011 онд “Оюутолгой” ХХК-д инженерийн албаны төслийн менежер, 2011-2012 онд “Оюутолгой” ХХК-д Бизнес стратегийн газарт арилжааны үндсэн зөвлөх, 2012-2013 онд “Петровис” ХХК-д Бизнес хөгжлийн газрын даргаар ажилласан. Үүний дараа тэрбээр МАН-ын Олон улсын харилцаа, намын зохион байгуулалт, хамтын ажиллагааны асуудал эрхэлсэн нарийн бичгийн даргаар томилогдсоноор улс төрийн гараагаа эхэлсэн гэхэд болно. Улмаар 2016-2020 онд Сангийн дэд сайдаар ажиллаж байгаад , 2020 оноос УИХ-ын гишүүн, 2022 оноос Боомтын сэргэлтийн асуудал хариуцсан сайдаар, 2023 оноос Монголын Социал демократ эмэгтэйчүүдийн холбооны Ерөнхийлөгчөөр ажиллахаар болж байна. Ийнхүү МАН-ын шинэ үеийн лидерүүдийн нэгээр Х.Булгантуяа тодорлоо.
Эх сурвалж: "Зууны мэдээ" сонин
2023 ОНЫ ХОЁРДУГААР САРЫН 1. ЛХАГВА ГАРАГ. № 25 (7010)