Б.ОД

Монголын анхны уран гулгалтын шоуг зохион байгуулах гэж буйгаа Монголын тэшүүрийн холбоо(МТХ)-ноос өнөөдөр мэдээллээ.

Шоуг Монгол, Япон улсын хооронд дипломат харилцаа тогтоосны 50 жилийн ойд зориулан хоёр улсын Тэшүүрийн Холбоо хамтран зохион байгуулах бөгөөд "Степпе Арена"-д энэ долоо хоногийн амралтын өдрүүдээр буюу нэгдүгээр сарын 27-28-нд болох юм байна.

Тоглолтыг жүжиг хэлбэрээр зохиомжилсон бөгөөд гол дүрд мэргэжлийн уран гулгагч Г.Марал-Эрдэнэ тогложээ. Найруулагчаар “Фауст”, “Гэм зэм” зэрэг жүжгээр танигдсан УДЭТ, Орфей театрын найруулагч М.Батболд, Дуурь бүжгийн эрдмийн театрын Ерөнхий зураач, урлагийн гавьяат зүтгэлтэн Г.Ганбаатар нар хамтран ажиллаж байна.

Тоглолтод дөрвөн тивийн аварга шалгаруулах тэмцээн (Four Condinents)-ий хошой хүрэл медальт, "Ростелеком" гранпри, Финляндия Трофи тэмцээний аварга дэлхий хэмжээний мэргэжлийн уран гулгалтын тамирчин Хонго Рика, ОУ-ын Тэшүүрийн холбооны Гранпри цуврал тэмцээний V байрын шагналт тамирчин Урамацу Чисато, Японы мэргэжлийн уран гулгалтын тамирчин Цунэхито Каракава, Японы мэргэжлийн уран гулгалтын тамирчин Хироки Хонда, Япон улсын үндэсний бүжигчин Азума Канхо, Япон улсын үндэсний бүжигчин Азума Канья, Япон улсын үндэсний бүжигчин Ханаяги Масакацу, бүжигчин, доктор МУСТА М.Мөнгөнцэцэг нар оролцох юм.

Эх сурвалж:www.polit.mn