Б.ОД
Монгол Улсын Ерөнхийлөгч Х.Баттулга Монгол Улсаас БНХАУ-д суух Онц бөгөөд Бүрэн эрхт Элчин сайдаар томилогдсон хошууч генерал Т.Бадралд Итгэмжлэх жуух бичгийг нь өчигдөр гардууллаа. Энэ үеэр Ерөнхийлөгч Х.Баттулга “Дэлхий даяар тархсан коронавируст цар тахлын үеийн онцгой нөхцөл байдалд Элчин сайдаар томилогдож байна. Тиймээс хоёр улсын иж бүрэн стратегийн түншлэлийн харилцааг гүнзгийрүүлэн хөгжүүлэхэд идэвх санаачилга гарган ажиллахыг хүсье. Тухайлбал, хөдөө аж ахуй, зам тээвэр, уул уурхай, эрчим хүчний салбаруудад хэрэгжүүлж буй болон хэрэгжүүлэх төслүүдийг ажил хэрэг болгох, идэвхжүүлэх чиглэлд онцгой анхаарал хандуулан ажиллаарай. Хоёр орны харилцааг тогтсон урсгалаар нь бус, шинэ эрч хүч, идэвх санаачилгаар хөтөлж, ЭСЯ-ны дипломатуудын ажлын тодорхой хувийг БНХАУ-ын улс төр, эдийн засгийн тухай судалгаа, мэдээлэл, дүн шинжилгээг тогтмол, прагматикаар хийхэд анхаарлаа хандуулах нь чухал” гэсэн юм.
Эх сурвалж:www.polit.mn