Б.ДОЛЖИНЖАВ

Эрүүл мэндийн яамнаас  коронавирусын халдварын талаарх ээлжит мэдээллээ хийлээ. Манай улсад өчигдөр /2020.07.19/ шинэ тохиолдол бүртгэгдээгүй байна.  Харин батлагдсан 287 тохиолдлоос 213 нь эдгэрчээ. Одоо ХӨСҮТ-д эмчлэгдэж байгаа 74 хүний 64-ийнх нь биеийн байдал хөнгөн, 10 нь хүндэвтэр гэж үнэлэгдсэн байна.  Энэ талаар ХӨСҮТ-ийн захирал Д.Нямхүү "Долдугаар сарын 19-нд нийт 330 хүний сорьцод шинжилгээ хийхэд бүгдэд нь коронавирус илрээгүй. Тодруулбал, долдугаар сарын 4-нд Токио-Улаанбаатарын онгоцоор ирсэн 253 хүний давтан шинжилгээ, ХӨСҮТ-д сэжигтэй гэж тусгаарласан долоон хүний давтан шинжилгээ, Ханги Мандалын боомтоор орж ирсэн жолооч нар болон Алтанбулаг боомтоор орж ирсэн тээврийн жолооч нар, Дархан-Уул аймагт тусгаарлагдсан дөрвөн хүний шинжилгээнд коронавирус илрээгүй. Мөн эдгэрч ХӨСҮТ-өөс гараад сувилалд байгаа 24 хүнд хяналтын шинжилгээ хийхэд вирус илрээгүй" гэв. Сүүлийн 24 цагт 119 тусгай дугаарт 122 дуудлага ирсэн бол шуурхай аппликэйшнээр АНУ-аас нэг иргэн холбогдож, зөвлөгөө мэдээлэл авчээ.

Дэлхийн бусад улс оронд тархалт ямар байгаар талаар ХӨСҮТ-ийн Тандалт, судалгааны албаны дарга А.Амбасэлмаа "Дэлхий дахинаа 14.6 сая хүн коронавируст халдвараар өвчилж, 608 мянган хүн эндлээ.  Сүүлийн 24 цагт 186 мянган хүн шинээр халдвар авч, дөрвөн мянга гаруй хүн нас барсан. Өчигдөр АНУ-д 67 мянга, Бразилд 23 мянга, Энэтхэгт 39 мянган хүн шинээр халдвар авсан. ОХУ-д зургаан мянган хүн шинээр халдвар авч, 95 хүн эндсэн байна" гэв. 

Эх сурвалж: www.polit.mn