Б.ОД
Эрүүл мэндийн яамнаас "Covid-19" цар тахлын халдварын цаг үеийн асуудлаар өдөр бүр 11:00 цагаас ээлжит мэдээллээ хийдэг. Энэ долоо хоногоос эхлэн ээлжит хэвлэлийн бага хурлыг долоо хоногийн гурван өдөр зохион байгуулахаар болсон. Тодруулбал, даваа, лхагва, баасан гаригт мэдээлэл хийж, бусад өдрүүдэд цахим хуудсаараа дамжуулан иргэдэд мэдээлэл хүргэхээр болсон. Тус яамнаас “ХӨСҮТ-ийн Вирус судлалын лаборатори, Дархан-Уул аймгийн вирус судлалын салбар лабораторт нийт 200 сорьцод шинжилгээ хийхэд коронавирус илрээгүй" хэмээн цахим хуудсаараа дамжуулан мэдээллээ. Манай улсад батлагдсан 310 тохиолдлоос 296 нь эдгэрч, 14 хүн ХӨСҮТ-д эмчлүүлж байна. Эмчлүүлж байгаа найман иргэний биеийн байдал хөнгөн, зургаан хүн хүндэвтэр байна. Харин дэлхийд 27.4 сая хүн халдвар авч, 896 мянган хүн нас баржээ. Тухайлбал, АНУ-д 6.4 сая хүн, Энэтхэгт 4.2 сая хүн, Бразилд 4.1 сая хүн, ОХУ-д нэг сая гаруй хүн халдвар авснаар тархалтаараа тэргүүлж байна.
Эх сурвалж:www.polit.mn