Д.НАМУУНЦЭЦЭГ
Нам эвсэл, бие даагчдын төлөөлөл дахин мэдэгдэл хийлээ. Тэд Монгол Улсын Ерөнхийлөгчид дараах шаардлагуудыг хүргүүлээд байна. Үүнд ,одоогийн сонгуулийн хороог бүрэн бүрэлдэхүүнээр нь огцоруулах, МАН-аас бусад нам эвсэл,бие даагчдийн тэгш төлөөллийг оруулж луйвар булхай бүрийг нэг бүрчлэн шалгах, мөн цагдаа, бусад хүчний байгууллагууд оролцохгүй байх. Шалгалтын дүн албан ёсоор гартал Ерөнхийлөгч УИХ-ын шинэ бүрэлдэхүүнийг хүлээн зөвшөөрөх үйл ажиллагааг явуулахгүй байх гэсэн шаардлагыг хүргүүлж байгаа юм байна.
МАХН-ын дарга Н.Энхбаяр:- МАН-ын троллууд сонгуульд ялагдчихаад одоо боль гэсэн мэдээллүүдийг тарааж байна. Гэвч би сонгуульд оролцоогүй. Тийм учир хэнд ч ялагдаагүй. Мөн дахиад луйврын сонгуульд нэр дэвших ямар ч сонирхол алга. Би ардчилалын суурь зарчмыг хамгаалахын төлөө өөрт байгаа бүх бололцоогоо ашиглаж шударга сонгууль явуулахын төлөө идэвхтэй үйл ажиллагаа явуулна. Бид саяхан сонгуульд өрсөлдөгчид байсан. Гэтэл бид хохирогчид байж. Тиймээс ард түмэндээ сонгох, сонгогдох эрхийг нь олгохын тулд бид нэгэн цул болж тэмцэж байна. Өнгөрсөн сонгуульд МАН мөн л луйврын аргаар олонхийн суудал авсан. Энэ удаа ч адилхан байлаа. Бид үүнийг хүлээн зөвшөөрч болохгүй. Монгол Улсад ардчилал байх уу, үгүй юу гэдэг ч Ерөнхийлөгчийн гарт байна.
Нийслэлийн МАХН-ын дарга Э.Эрдэнэжамъяан:- Коронавирус гарсан гэдгээр далимдуулаад биднийг ажиглалт ч хийлгүүлэхгүй байна. Дахин гар тооллогод ч мөн адил ойртуулаагүй. Сонгогчдын нэрсийг бичсэн журналыг ил болгож ард түмэнд харуулах хэрэгтэй. Нэг дүүрэг дээр зургаан мянган царцаа очиж сонгогчдын саналыг идээд байгаа. Өнөөдөр дахиад дүр эсгэсэн тооллого болоод байна. Жүжиг болоод байна. Үүнийг төрийн албан хаагчдаар хийлгэхгүйгээр ард түмэн өөрсдөө хаягийн бүртгэлээ шалгах хэрэгтэй. Үнэхээр булхай хийгээгүй л юм бол МАН битгий ай гэлээ.
Эх сурвалж: www.polit.mn