АНУ-ын Пенсильвания мужийн Аллентаун хотын “PPL Center” спортын ордонд бямба гарагийн үдэш буюу  хоёрдугаар сарын 8-нд мэргэжлийн боксын WBC холбооны 57 кг-ийн жингийн дэлхийн аваргын тулаан болно. Улаанбаатарын цагаар ням гарагийн өглөөний 10 цагийн орчимд болох энэ тулаан болох юм.     “Мистер” хочит Гэри Рассель цол хамгаалах тулаанаа IBO холбооны дэлхийн аварга, “King Tug”  хочит Н.Төгсцогттой хийх юм. Тулааныхаа талаар Гэри Рассель “ Дэлхийн түүхэнд монголчууд тулаанч дайчин хүмүүс гэгддэг. Тэд олон улс орон, ард түмнийг ялан дийлж эзэлж байсан түүх бий. Харин энэ түрэмгийлэл миний өвөг дээдэстэй тулалдах хүртэл үргэлжилсэн юм. Монголчууд 1260 оны үед Египет руу довтолсон. Тэд миний өвөг дээдэстэй тулалдсан. Та бүхэн Чингис хааны тухай сонссон байх. Өвөг дээдэс маань Чингис хаантай тулгаран байлдаж, түүнийг ялсан, монголчууд барууны соёл иргэншлийг эзлэх гэж байсныг өвөг дээдэс маань зогсоож чадсан. Яг ийм тулаан бямба гарагийн орой дахин давтагдах болно” хэмээн ярьсан юм.

Ташрамд дуулгахад, Вашигтонд төрсөн Гэри Рассель Египет гаралтай бөгөөд тэр жилийн 6-7 тулаан хийж, маш хурдан хугацаанд нэр хүнд, карьераа өсгөж чадсан гэдгээрээ онцлогтой билээ.