Касым-Жомарт Токаев  Фото: Mukhtar Kholdorbekov / Reuters

Д.АРИУН Казахстаны Сонгуулийн төв комисс өнгөрсөн баасан гариг /2019.05.03/-т  Касым-Жомарт Токаевыг  Ерөнхийлөгчийн сонгуульд нэр дэвшигчээр бүртгэж авлаа гэж ТАСС агентлаг мэдээлсэн байна. Ингэснээр Казахстаны Ерөнхийлөгчийн сонгуульд өрсөлдөхөөр бүртгүүлж байгаа хамгийн эхний албан тушаалтан нь тэр болж байгаа аж. Касым-Жомарт Токаев нь одоо тус улсын Ерөнхийлөгчийн үүргийг түр орлон гүйцэтгэж байгаа юм. Тэрээр нэр дэвшүүлэхэд шаардлагатай бичиг баримтуудыг бүртгүүлэн Сонгуулийн төв комисст өгсөн байна. Үүнд эрүүл мэндийн байдлын талаарх тодорхойлолт, хөрөнгө орлогын мэдүүлэг зэрэг орж байгаа бөгөөд Сонгуулийн төв комисс түүнд нэр дэвшигчийн үнэмлэхийг гардуулжээ. Какахстаны эрх баригч Нур-Отан намын дарга, тус улсын анхны Ерөнхийлөгч Нурсултан Назарбаев  Токаевын нэрийг дэвшүүлж байгаагаа өнгөрсөн дөрөвдүгээр сарын 23-нд зарласан. Эрх баригч намын их хурлын төлөөлөгчийн Назарбаевын энэ саналыг дэмжсэн билээ. Касым-Жомарт Токаев өнгөрсөн гуравдугаар сарын 20-ноос  халаагаа өгсөн анхны Ерөнхийлөгч Нурсултан Назарбаевын халааг авч тус улсын Ерөнхийлөгчийн үүргийг түр орлон гүйцэтгэж ажиллаж байгаа. Казахстаны Ерөнхийлөгчийн сонгууль зургадугаар сарын 9-нд болно. Нэр дэвшигчдийг бүртгэж дуусах хугацаа нь тавдугаар сарын 11-нээр тасалбар болох юм. Дараа нь сонгуулийн сурталчилгаа эхэлж, зургадугаар сарын 8 хүртэл үргэлжлэх аж. Эх сурвалж: polit.mn