Ч.ТУЛГА
Монголын дизайнеруудын холбооноос жил бүр зохион байгуулдаг “Гоёл” наадмын шилдгүүд өнөөдөр тодорно. Тус наадам энэ жил 31 дэх жилтэйгээ золгож байна. Энэ наадам нь ирэх жилийн загварын чиг хандлагыг тодорхойлохоос гадна загвар өмсөгчдийн чансааг илтгэдэг “Топ модель” шалгаруулдгаараа онцлог. Өнгөрсөн жил Т.Халиун энэ эрхэм шагналын эзэн болж байв. Наадмын “Загварын долоо хоног” энэ сарын 26, 27, 28-нд "Blue sky” цамхагт амжилттай үргэлжилсэн. Энэ жилийн наадамд 80 гаруй загвар өмсөгч оролцож, дизайнеруудын урласан шинэ брэндүүдийг амилуулах юм. Мөн топ модель О.Уянга, Э.Сэлэнгэ, О.Пүрэвдулам, Х.Бадамгэрэл, Г.Уранцэцэг, Ч.Ундрах нар тайзнаа алхах аж. “Гоёл-2019” наадамд Монголын шинэ брэндүүд, шинэ дизайнерууд оролцож байгаа нь энэ жилийн онцлог юм гэж Монголын дизайнеруудын холбооны хувцас дизайны салбарын тэргүүн, "Шилмэл загвар" компанийн ерөнхий захирал Ч.Оюунцэцэг онцолсон юм.
Эх сурвалж: www.polit.mn