Ч.ГАНТУЛГА Энэ удаагийн залуус буландаа УДЭТ-ын залуу жүжигчин Э.Тодгэрэл, Б.Шинэбаяр, Б.Золжаргал нарын тухай онцолж байна. Тэд театрын шинэ дүр төрх төдийгүй “Драм дөрөв” хамтлагийн залгамж халаа болж, “Драм гурав” хамтлагийг байгуулаад байгаа юм. 2000 оны эхээр УДЭТ залуу уран бүтээлчдээр хүрээгээ тэлсэн нь жүжигчин Б.Болд-Эрдэнэ, Н.Наранбаатар, Б.Амгаланбаатар, Г.Эрдэнэбилэг, Д.Ганцэцэг нар байв. Тэд нэгэн үе театрын шинэ дүр төрх, залуу жүжигчид байлаа. Алдарт “Надаар тоглосон хайр”-аас эхлээд хайр сэтгэлийн олон бүтээлд дүрээ мөнхөлж, дэврүүн залуу насныхаа гал цогийг асаасан байдаг. Тэд одоо дунд үеийнхэн болжээ. Харин уран бүтээлийн хувьд агуу “Гамлет”, “Тэнгэрийн хүү”-ээр “зиндаархсан” туршлагатай уран бүтээлчид болсон гэж онцолмоор. Залуус зөвхөн жүжиглээд зогссонгүй. “Драм дөрөв” хамтлаг байгуулж, “Улаанхуаран, цэргийн хуаран, улсын цирк, драмын театр” хэмээн уянгалуулсаар хөгжмийн урлагт хүч сорьсон удаатай. Жүжигчин Г.Эрдэнэбилэгээс хамтлагийн үндэс суурь нь юу вэ хэмээн хэмээн асуухад “Нөхөрлөл” гэж хариулсан байдаг. Яг л энэ замналаар явж буй энэ цагийн “Драм гурав” нь залуу жүжигчин Б.Шинэбаяр, Э.Тодгэрэл, Б.Золжаргал юм. Тэд анх 2013 онд УДЭТ-ын дэргэдэх студид танилцаж, нөхөрлөл нь эхэлжээ. Тэд уран бүтээлчдийн хүсч, мөрөөддөг “Гэгээн муза” шагналыг гартаа атгасан, авьяаслаг залуус. Харин урын сандаа зургаан дуутай болжээ. Тэгвэл энэ цагийн театрын урлагийн өнгө төрхийг тодорхойлж буй залуу авьяастнуудын бүтээсэн зарим дүрээс онцлоё. ОРЧИН ЦАГИЙН РОМЕО   Жүжигчин Б.Шинэбаяр залуу жүжигчин бүхний мөрөөдөл болсон “Ромео Жульетта” жүжигт тоглосон азтай нэгэн. Ингэснээр тэрээр Монголын театрын түүхэнд гурав дахь Ромео болж нэрээ мөнхөлсөн юм. Түүний бүтээсэн Ромео гэнэн томоогүй мөртлөө эр зоригтой, зоргоороо байсныг санаж байна. Дүрийнхээ тухай “Ромеогийн дүрд сонгон шалгаруулалт зарлаагүй. Найруулагчийн л сонголт. Гэхдээ намайг яагаад сонгосон юм бэ гэж би асууж байгаагүй” хэмээн ярьсан байдаг. Тэрээр “Адууны түүх” жүжгийн Жанжаагийн дүрээр “Гэгээн муза” хүртсэн юм.   ОНОШОО ТОГТООСОН МАКС   Жүжигчин Э.Тодгэрэл анх “Чөлөөт хос” жүжгээр үзэгчдээс өндөр үнэлгээ авсан. Үүний дараа “Адууны түүх”, “Ромео Жульетта” зэрэг бүтээлд тоглож шинэ цагийн шилдэг залуу жүжигчин гэдгээ баталсаар байна. Харин түүний хамгийн сүүлийн тэсрэлттэй дүр нь “Оддын өвчин” жүжгийн Макс. Тэрээр дүрийнхээ тухай “Макст надтай төстэй нэг зан чанар бий. Тэр нь багаасаа урлагт ухаангүй дурласан” гэж онцолсон юм. Тиймээс ч энэ дүр дээр ажиллахдаа шатаж, хүсч, мэдэрч тоглосон нь үзэгчдийн нижигнэсэн алга ташилтаар нотлогдож байв.     НАЙДВАРГҮЙ НАМЖИЛ   Жүжигчин Б.Золжаргалын хувьд “Царцаа Намжил” жүжгээр театрын эрхэм хүндтэй шагналын эзэн болсон. Тэрээр жүжигийнхээ тухай “Үлгэрээр дамжуулж хүүхдүүд болон эцэг эхчүүдэд ухаарал өгөхийг хүссэн. Хүний амьдралд эрдэм гэдэг ямар чухал болохыг эцэст нь Намжил ухаардаг” гэж байв. Найруулагчид Б.Золжаргалд ихэвчлэн эсрэг дүр өгөх нь бий.  Тэрээр хамгийн сүүлд “Оддын өвчин” жүжигт Тахар хэмээх увиагүй зантай буудлын үйлчлэгчийн дүрийг бүтээсэн юм.   Эх сурвалж: “Зууны мэдээ” сонин