Т.САЙХАН МАН дотор үүссэн нөхцөл байдал нэлээд хурцдаж байна.  Тэгвэл өнөөдөр /11.15/ энэ асуудлаар МАН-ын дэргэдэх ахмадын холбооны тэргүүлэгчид хуралдаж байна.  Тус холбооны тэргүүнээр Ц.Сүхбаатар ажилладаг.  Тэргүүлэгчдэд Ерөнхий сайд асан Ш.Гунгаадорж, Д.Содном,  Төрийн шагналт Н.Жанцанноров  зэрэг төрийн өндөр албан тушаал хашиж байсан эрхмүүд багтдаг билээ.  Тэд өнөөдөр үүссэн улс төрийн нөхцөл байдлын талаар ярилцаж, ямар нэгэн шийдэлд  хүрэх юм байна. Ерөнхийдөө ахмадын холбооны тэргүүлэгчдийн зүгээс  улс төрийн шинэчлэлийг намаасаа эхлэх нь зүйтэй гэж үзэж буй бололтой.  Саяхандаа хоёр ч удаа хуралдсан эрх баригч намын удирдах зөвлөлийн хуралд зарим гишүүд намаас шинэчлэлийг эхлүүлэх нь зүйтэй гэж үзсэн  ч намыг дарга  улс төрийн шийдвэрүүдийг гаргаад явсан байдаг.  Тухайлбал, УИХ-ын гишүүн Д.Хаянхярваа “Намын удирдах зөвлөлийн хурал дээр Ц.Нямдорж сайд  Намын Ерөнхий нарийн бичгийн дарга Д.Амарбаясгаланд  хамгийн түрүүнд хариуцлага хүлээлгэх нь зүйтэй гэсэн санал хэлсэн. Гэсэн ч Д.Амарбаясгалан ТББ нь надтай ямар ч хамааралгүй гэж хэлээд өнгөрсөн” гэсэн байдаг.  Намын Ерөнхий нарийн бичгийн дарга Д.Амарбаясгалан нь мөн өөрийн эзэмшил бүхий компаниараа дамжуулан ЖДҮХС-гаас зээл авсан нь тодорхой болсон билээ. Ийнхүү нам доторх эв нэгдлийн асуудал ахмадуудын санааг нэлээд чилээж, тэд намаа эхлээд цэгцлэх нь зүйтэй гэж үзэж байгаа бололтой.  Эх сурвалж:www.polit.mn