Б.ОД
Иргэн Д.Мягмарсүрэнг цагдаа нар зодож хүнд гэмтээлээ гэсэн мэдээлэл энэ сарын 19-нд буюу өчигдөр цахим орчинд цацагдсан. Энэ хэргийн талаар ЦЕГ-аас тодрууллаа.
Цагдаагийн байгууллагын утсанд энэ сарын 18-ны 03:11 цагт иргэн “Б”-ээс “Манай нөхөр согтуу агсам тавиад байна” гэсэн дуудлага ирсний дагуу тус дүүргийн цагдаагийн хэлтсээс очиж шалгахад 1980 онд төрсөн иргэн Д.Мягмарсүрэн нь архи согтууруулах ундааны зүйл хэрэглэсэн, нүд нь хөхөрсөн хамраас нь цус гарсан байдалтай байсныг эрүүлжүүлэх байранд хүргэжээ.
Иргэн Д.Мягмарсүрэн нь эрүүлжүүлэх байранд байх хугацаандаа хэвлий хэсгээр өвдсөний улмаас гэмтлийн эмнэлэгт хүргэгдэн хэвлийн хөндийн мэс засалд орсон. Одоогоор тус эмнэлэгт хэвтэн эмчлүүлж байгаа бөгөөд биеийн байдал хэвийн гэдгийг эмч хэллээ. Мөн энэ хэргийг Сонгинохайрхан дүүрэг дэх цагдаагийн газарт шалгаж эхэлсэн байна.
Цагдаагийн байгууллагаас анх Д.Мягмарсүрэнгийн гэрт дуудлагаар очиход түүний эхнэр, хүүхэд нь байсан байна. Мөн болсон үйл явдал, автомашинаар эрүүлжүүлэх байр хүргэх үе, эрүүлжүүлэх байранд байх үе гэсэн бүх үйл явдал цагдаагийн алба хаагчийн энгэрийн камерт бичигдэн үлджээ. Дээрх камерын бичлэг болон гэр бүлийн гишүүдийн тайлбараар Д.Мягмарсүрэнг цагдаагийн алба хаагчид зодоогүй болох нь тогтоогдож байгаа юм байна.
Тиймээс энэ үйл явдлын талаар хэвлэл, мэдээллийн хэрэгслээр “Иргэн Д.Мягмарсүрэн цагдаа нарт зодуулж, нарийн гэдэс нь тасарчээ” гэсэн худал мэдээллийг цахим орчин, хэвлэл, мэдээллийн хэрэгслээр түгээсэн асуудлыг цагдаагийн байгууллагаас шалгаж байна.
Эх сурвалж:www.polit.mn