• Зууны мэдээ сонин онлайн захиалга

Жоржиа муж Жо Байдены ялалтыг гар тооллогоор баталгаажууллаа

2020-11-20 17:26

 

Б.ДОЛЖИНЖАВ

АНУ-ын Ерөнхийлөгчийн сонгууль энэ сарын 3-нд болж, 290 төлөөлөгчийн санал авснаар Жо Байден ялсан. Гэвч Трамп ялагдлаа хүлээн зөвшөөрөхгүй, зарим мужийн саналыг дахин гараар тоолохыг шаардсаар байгаа билээ. Тэгвэл Дональд Трампын хамгийн олон төлөөлөгчийн саналаа луйвардуулсан хэмээн үзэж байгаа Жоржиа мужийн дахин тооллоогоор Байден ялсныг  тус  мужийн Төрийн нарийн бичгийн даргын ажлын албанаас  өнөөдөр зарлалаа. Тодруулбал, аудитын шинжилгээгээр Байден Трампаас 12284 саналаар илүүрхэж, 16 төлөөлөн сонгогчийн санал авсныг баталгаажуулав. Энэ нь өмнөх саналын тооноос бага зэрэг буурсан үзүүлэлт боловч санал луйвардсан зүйл болоогүй гэдгийг аудитын газрын шинжээчид баталсан байна.

Энэ талаар Жоржиа  мужийн Төрийн нарийн бичгийн дарга, Бүгд найрамдах намын гишүүн Брэд Раффенспергер “Жоржиа муж түүхэндээ анх удаа саналыг дахин гараар тоолж, өмнөх үр дүн нь үнэн зөв байсныг баталлаа. Богино хугацаанд маш чухал үүргийг гүйцэтгэхийн тулд манай хамт олон шаргуу хөдөлмөрлөлөө” гэж ярьжээ.

 Харин Жоржиа муж дахь Байдены компанит ажлын олон нийттэй харилцах албаны дарга Жаклин Ротенберг “Жоржиагийн сонгогчид Жо Байденг дараагийн ерөнхийлөгчөөр сонгосныг бид мэдэж байсан. Үүнийг дахин баталлаа. Саналыг гараар дахин тоолох ажлыг илүү цагаар гүйцэтгэсэн сайн дурын ажилчид, сонгуулийн штабынхандаа талархаж байна” хэмээн ярьсан байна. Гараар тоолоход 5800 саналыг машин тоолоогүй байсны 1400 нь Трампад өгсөн санал байсан аж. Энэ нь сонгогчийн алдаанаас болсон бөгөөд санал луйвардахтай ямар ч холбоогүйг албаныхан тайлбарлаж байна. Түүнчлэн дахин тоололт нь өмнөхөөсөө зөрөөгүй нь сонгогчдын итгэлийг улам нэмэгдүүлсэн явдал болсныг онцлов. Гэсэн ч Трамп дахин тооллогын үр дүнг зөвшөөрөхгүй, луйвардсан хэмээн твиттертээ бичжээ.  Үүнээс гадна Жоржиа  мужийн Төрийн нарийн бичгийн дарга, Бүгд найрамдах намын гишүүн Брэд Раффенспергерыг шударга, ил тод сонгууль явуулаагүй хэмээн огцрохыг Трамп болон намын зарим сенатч шаарджээ.

 Ерөнхийлөгчийн сонгуулийн маргаан дууссан ч Жоржиа мужийн сенатын хоёр дахь шатны сонгуульд аль намын төлөөлөгч ялах нь АНУ-ын улс төрийн хүрээний анхаарал татсан асуудал болоод байна. Учир нь одоогоор Бүгд найрамдахчууд сенатын танхимд 2-3 суудлаар илүү байгаа юм.

Эх  сурвалж:CNN

АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

Холбоотой мэдээ