Б.ТУУЛ

  "Эрдэнэс-Тавантолгой" ХХК-ийн уурхайчид Хятадын хөрөнгө оруулалттай "Ти Ти Жи Ви Си Өү”  ХХК-ийн дэргэд 1000 гаруй ажилчдыг төлөөлж, Үйлдвэрчний эвлэл байгуулсаныхаа төлөө хууль бусаар ажлаасаа халагдсан 10 залуу шударга ёсыг нэхэж, хэвлэлийн бага хурал хийлээ. Тэд Өмнөговь Аймгийн Цогтцэций сумын Тавантолгой ордын Зүүн Цанхийн уурхайд олборлолт явуулж буй “Эрдэнэс-Тавантолгой” компанийн туслан гүйцэтгэгч, “TTJVCO”   компанид 2017 оноос ажиллаж эхэлсэн бөгөөд  ажиллах орчин нөхцөл, цагийн хуваарь, захиргааны дарамт шахалт, цалингийн үнэлгээ бага зэргээс шалтгаалан Үйлдвэрчний эвлэл байгуулж, асуудлаа шийдвэрлүүлэхээр нэгдсэн байна. Гэтэл 2020 оны дөрөвдүгээр сард эдгээр 10 гишүүнийг компанийн нэр хүндэд сөргөөр нөлөөлсөн. “ЭТТ Эв санааны нэгдэл” Үйлдвэрчний эвлэлд салбар хороо байгуулсан, С.Эрдэнийг даргаар сонгосон” гэсэн шалтгаанаар ажлаас нь халжээ. Тус компаниас гаргасан энэхүү шийдвэр нь Монгол Улсын үндсэн хууль, хөдөлмөрийн гэрээ, холбогдох дүрэм журамд нийцэхгүй, хууль зөрчсөн үйлдэл учраас хууль хяналтын байгууллагууд энэ асуудалд анхаарал хандуулж, дээрх асуудлыг монгол хүний эрх ашгийн төлөө нааштайгаар шийдвэрлэж өгнө үү. “Бид энэ талаар өнгөрсөн дөрөвдүгээр сараас хойш шүүхийн байгууллагаар явсан боловч дорвитой арга хэмжээ авсангүй. Хамгийн гол нь монгол хүн эх орондоо ажиллаж хөдөлмөрлөж, үзэл бодлоо чөлөөтэй илэрхийлж чадахгүй болсон байна. Монгол залуус Үйлдвэрчний эвлэл байгуулж болохгүй, үг хэлэх эрхгүй болсон байна. Тиймээс иргэдийн ажиллаж, хөдөлмөрлөх эрхийг хязгаарлаж, ажлаас хууль бусаар халсан, Захиргааны тухай хууль, Үйлдвэрчний эвлэлүүдийн эрхийн тухай хууль, Хөдөлмөрийн хуулийг ноцтой зөрчсөн “TTJVCO”-ийн үйл ажиллагааг шалгаж, монгол хүний эрх ашигт нийцүүлэн энэ асуудлыг шийдвэрлэж өгөхыг шаардаж байна” хэмээн холбогдох хуулийн заалтуудыг уншиж танилцуулсан юм. Мөн “TTJVCO”-ийн хууль бус үйлдлүүдийг нотолсон бичиг, баримтуудыг дэлгэв.

Эх сурвалж: www.polit.mn