Б.ОД

Үндэсний бөхийн салбар хорооноос Үндэсний их баяр наадмын хүчит бөхийн барилдаанд шөвгөрсөн 16 бөхөөс авсан допингийн шинжилгээний хариуг өнөөдөр танилцууллаа. Үндэсний бөхийн салбар хорооны дарга Б.Баасандорж "Есдүгээр сарын 8-нд Монголын үндэсний допингийн эсрэг байгууллагаас гурван бөхийн шинжилгээний хариуг ирүүлсэн. Эдгээр бөхийн нэрийг танилцуулъя. Нэгт, Үндэсний их баяр наадмын хүчит бөхийн барилдаанд зургаа даван шөвгөрсөн, Улсын харцага Б.Бат-Оршихоос Дэлхийн допингийн эсрэг агентлагаас гаргасан "Хориглосон жагсаалт 2020"-д орсон S1.1 бүлгийн Тренболон, S4 бүлгийн Мелдониум, S5 бүлгийн Ацетазоламид гэх гурван төрлийн бодис илэрсэн. Мөн найм давж үзүүрлэсэн, Улсын аварга Н.Батсууриас дээрх хориглосон жагсаалтад багтсан S4 бүлгийн Триметазидин хэмээх нэг төрлийн бодис, зургаа давж шөвгөрсөн, улсын арслан Р.Пүрэвдагваас хориглосон жагсаалтад багтсан S1.1 бүлгийн Норандростерон, S1.1 бүлгийн Дростанолон, S4 бүлгийн Тамоксифен гэх гурван төрлийн бодис илэрсэн" гэж ярилаа.  Журамд заасны дагуу шинжилгээний хариу ирсний дараагаар дээрх гурван бөхөд танилцуулсан.  Тэд бүгд А сорьцын шинжилгээний хариуг хүлээн зөвшөөрсөн билээ. Ингэснээр Б сорьцыг хийлгэх шаардлагагүй болж байгаа юм.

Эх сурвалж:www.polit.mn