П.ХҮСЛЭНТУЯА

“Автобусны шахаа тойрсон авлигын асуудал буюу Хятадын цахилгаан автобусны цаана нуугдаж буй асуудал” сэдвээр Үндэсний аж үйлдвэрийн зөвлөл, монгол инженерүүдийн төлөөлөл мэдээлэл хийлээ. Энэ тухай “Монгол машин байгууламж” ХХК-ийн үйлдвэрийн дарга М.Гэрэлчулуун “Бид анх “Мон-30” гэдэг том оврын цахилгаан автобусыг эх орондоо үйлдвэрлэсэн. Уг автобусны нээлтэд Ерөнхий сайд У.Хүрэлсүх, холбогдох албаны хүмүүстэй оролцохдоо “Байгальд хор хөнөөлгүй, иргэд үйлчлүүлэхэд тав тухтай автобусыг хямд өртгөөр эх орондоо үйлдвэрлэсэн инженер, техникийн мэргэжилтнүүдэд баяр хүргэж, дэмжиж ажиллана” гэдгээ мэдэгдсэн. Гэтэл өнөөдөр энэ амлалт нь хэрэгжихгүй байна. БНХАУ-аас 1200 ширхэг автобусыг Хятадын Хөгжлийн банкнаас зээлээр авах гэж байна. Хэрэв уг автобусыг авах юм бол Монгол Улс нэг их наяд төгрөгийн өрөнд орно. Монголчууд дотооддоо автобус үйлдвэрлэж чадна. Үүний тод жишээ нь бид 300 тээврийн хэрэгслийг Монголд угсарч үйлдвэрлэсэн. Нийслэл хотод үйлчилж буй троллейбуснууд 100 хувь Монгол инженерүүдийн  эх орондоо угсарч үйлдвэрлэсэн автобус байгаа. Бидний үйлдвэрлэж буй автобус 194 мянган ам.долларын үнэтэй. Гэтэл Хятадаас оруулж ирэх гэж байгаа автобус нь 242553 доллар буюу манайхаас хэд дахин үнэтэй байна. Хэрэв “Монгол машин индустриал” үйлдвэр маань ажиллаж байсан бол 500 залуу ажлын байраар хангагдах байсан. Тиймээс монгол иргэдээ  ажлын байраар хангаж, инженерүүдээ ажиллах нөхцөл боломжоор хангаж өгөөч” гэв. Мөн жил бүр гаднаас оруулж ирдэг шахааны автобустай холбоотой төсөв тооцоог нарийн шалгаж, энэ хэрэгтэй холбоотой, дундаас нь мөнгө завшсан байж болзошгүй бүлэг хүмүүс буюу Улаанбаатар хотын захирагч асан, УИХ-ын гишүүн С.Амарсайхан, УИХ-ын гишүүн Д.Сумьяабазар, Нийслэлийн дэд бүтэц хариуцсан дэд дарга Б.Отгонсүх нарыг АТГ-т өгч шалгуулна гэдгээ мэдэгдэв.

Эх сурвалж: www.polit.mn