Т.САЙХАН
УИХ дахь МАН-ын бүлэг өнөөдөр /08.28/ хурал зарлажээ. Хуралдаанаар Сонгуулийн ерөнхий хорооны зарим гишүүн болон СЕХ-ны дарга Ч.Содномцэрэнг чөлөөлөх асуудлыг хэлэлцэж байна. СЕХ-ны дарга Ч.Содномцэрэн тэтгэвэртээ гарч байгаа тул чөлөөлөгдөх хүсэлтээ өгсөн гэх мэдээлэл байгаа юм.
Ерөнхийлөгч Х.Баттулга анхдугаар чуулганыг нээж хэлсэн үгэндээ "CЕХ маргаантай асуудлуудад тайлбар өгсөнгүй, таг суусаар олон нийтэд асар их эргэлзээ төрүүлсээр сонгуулийг дуусгалаа. Цаашид ийм байдлаар ажиллаж болохгүй. СЕХ-ны удирдлага нэн даруй огцрох шаардлага үүсэж байна. 2009 оноос хойш удирдлага солигдоогүй байгаа нь өнөөгийн ялзрал, асар их биеэ тоосон, надад хэн хэлэх вэ гэсэн ийм хандлага үүсгэсэн байна. Үүнийг цааш нь үргэлжлүүлж, ийм арга барилаар хэрхэвч ажиллаж болохгүйг сонгуулийн явц харууллаа. Ард түмний төлөөллийн байгууллагадаа итгэх итгэлийг анхнаас нь булингартуулж, эргэлзээ үүсгэдэг энэ байдлыг таслан зогсоохоос өөр арга алга. Сонгуулийн Ерөнхий хорооны удирдлага яаралтай өргөдлөө өгч, огцрохыг би энэ индэр дээрээс шаардаж байна" гэдгийг хэлж байсан удаатай.
Тэгвэл МАН-ын бүлэг уг асуудлыг ээлжит бус чуулганаар шийдвэрлэхээр болжээ.
Эх сурвалж:www.polit.mn