Б.ДОЛЖИНЖАВ

Оросын холбооны улс коронавирусын эсрэг дэлхийн анхны вакцинаа баталгаажуулж “Спутник-V” хэмээн нэрлэж байгаагаа ерөнхийлөгч Владимир Путин өчигдөр зарлалаа. Энэ нь  ОХУ-ын Эрүүл мэндийн яамны харъяа микробиологи, халдварт өвчин судлалын Гамалейн үндэсний судалгааны  хүрээлэнгийн зургаагаас долдугаар сарын туршилтын үр дүнд бүтсэн вакцин юм. ОХУ-ын “Шууд хөрөнгө оруулалтын сан” вакциныг үйлдвэрлэхэд дөрвөн тэрбум рубль зарцуулжээ. Вакцины эхний туршилтад 38 энгийн хүн, 38 сайн дурын цэрэг, II туршилтад 100 хүнийг хамруулсан юм. Харин сүүлийн туршилтаа Саудын Араб, Арабын нэгдсэн Эмират, Филиппин улстай хамтран өргөн хүрээнд олон хүнийг хамруулан явуулна гэдгээ өчигдөр “Шууд хөрөнгө оруулалтын сан”-гийн тэргүүн Крилл Дмитриев мэдэгдлээ. III туршилтаа явуулахаасаа өмнө бэлэн боллоо хэмээн олонд зарлаж, гэрчилгээ олгосон вакцины аюулгүй байдалд судлаачид эргэлзэж байна.  Тус улсын Эрүүл мэндийн яамны мэдээлж буйгаар энэ вакциныг тариулснаар коронавирусаас хоёр жилийн турш хамгаалах дархлаатай болох юм байна. Тиймээс эрүүл мэндийн ажилтан, багш нар болон бусад эрсдэлт бүлгийнхнээ хамгийн эхэнд вакцины урьдчилан сэргийлэх тарилгад хамруулах аж. Түүнчлэн Ерөнхий сайдын туслах Татяана Голикова энэ сарын эхээр эмч нар вакциндаа хамрагдаж эхэлнэ гэж мэдэгдлээ. Вакцины үйлдвэрлэл ирэх сараас эхэлж аравдугаар сараас олон нийтэд хүрэх юм байна.

“Спутник-V” вакциныг Дмитриев болон түүний гэр бүлийнхэн, Путины нэг охин тариулжээ. “Охин нэг өдөр 38 градус хүртэл халуурсныг эс тооцвол өөр нөлөө үзүүлээгүй” хэмээн Путин ярьжээ. Харин ОХУ-ын зарим улс төрчид болон бизнесменүүд вакцин дөрөвдүгээр сарын эхээр  бэлэн болно хэмээн өнгөрсөн сард “Bloomberg” телевизэд ярьсан байна. Тус улс 1957 онд дэлхийд анх удаа сансарын хиймэл дагуулыг амжилттайгаар хөөргөж байсан. Тиймээс “Ковид-19” эсрэг вакциндаа анхны хиймэл дагуулынхаа “Спутник-V” нэрийг оноожээ. ДЭМБ энэ вакцинд гэрчилгээ олгохоор судалж байгаа аж.  Үүнээс гадна дэлхий дахинаа 160 төрлийн вакцин туршилтын шатандаа явж байна.

 Эх сурвалж:The Moscow Times, Euronews