Д.АРИУН
Холливудын нэрт жүжигчин, найруулагч бас тулааны урлагийн мастер Стивен Сигал өчигдөр /2020.07.20/-нд Буриадад ирсэн байна. Буриадад ирэх долоо хоногийн турш байхаар төлөвлөж байгаа жүжигчний хөтөлбөрт ОХУ дахь Буддын шашны гол төв болон Иволгин хийд, буриадын соёл уламжлалыг хадгалж үлдсэн нутаг болох Тарбагатай, тэрчлэн ЮНЕСКО-ийн бүртгэгдсэн дэлхийн байгалийн гайхамшигт газруудын нэг болох Байгал нуураар аялах зэрэг багтаж байгаа аж.
Стивен Сигал хэлэхдээ, “Байгал бол дэлхийн хамгийн чухал нуур гэж би үздэг. Онцгой ариун дагшин газар бөгөөд энэ бүс нутаг болон нуурыг хамгаалах нь маш чухал ач холбогдолтой. Миний олон найз нөхөд, ойр дотнын хүмүүс энд амьдардаг тул энэ бүгд найрамдах улс миний хувьд их чухал” гэсэн талаар baikal-daily.ru сайт мэдээлжээ.
Бүгд найрамдах улсын Засгийн газрын хэвлэлийн албаны мэдээлэлд нэр хүндтэй зочин нь угсаатны зүйн төвд зочлохоос гадна жүжигчин Иволгин хийдэд Буриадын тамирчидтай хамт бэлтгэл хийх, Байгал нуураар аялах хүрээнд Ольхон арал дээр зочлох зэргийг дурдсан байна.
Стивен Сигал буддын шашин шүтдэг. Дөрвөн жилийн өмнө Оросын иргэншил авсан. Монгол гаралтай гэдэг. Өвөг дээдэс нь монгол хийгээд буриад цустай байсан гэдгийг тэрээр нэг бус удаа ярилцлагадаа дурдсан байдаг билээ.
Эх сурвалж: www.polit.mn