Б.ДОЛЖИНЖАВ

АНУ-ын эм үйлдвэрлэлийн том компани “Gilead Sciences”-ийн Эболаг эмчлэхэд зориулж үйлдвэрлэсэн “Remdesivir” эмийг коронавирусын эсрэг хамгийн үр дүнтэй хэмээн үзэж дэлхий нийтээр эмчилгээндээ ашиглаж байна. Энэ эм Энэтхэгт хамгийн эрэлттэй байгаа бөгөөд Делигийн хар зах дээр худалдаалагдаж эхлээд богино хугацаанд дуусчээ. Үүнтэй холбогдуулан үнэ нь хэд дахин нэмэгдэж, улмаар өвчтөнүүд худалдан авч чадахгүйд хүрсэн байна. Энэ талаар хуучин Делигийн эмийн санч “Бид гурван хуруу шил эмийг 30 мянган рупигээр зардаг. Нэг хуруу шилний үндсэн үнэ 5400 рупи ч өвчтөн 5-6 хуруу шил эмийг тогтмол хэрэглэх ёстой. Гэтэл зарим газар ганц хуруу шил эмийг 38 мянган рупигээр зарж байна” гэж ярьжээ. Харин Делигийн оршин суугч “Нагац ахдаа хоёр өдөр хэрэглэх эм авахын тулд 50 дэлгүүрээр орсон. Тэд бүгд нэг хуруу шил эмийг 2-3 дахин нэмсэн үнээр авахыг санал болгосон. Хайртай хүнийхээ амийг аврахын тулд удаан хугацаанд хадгалсан мөнгөө эмэнд зарцуулаад дуусч байна” гэжээ. Нэг хуруу шил эмний үнэ 5400 рупиг Монгол төгрөгт шилжүүлвэл 200 гаруй мянган төгрөг болно.

Энэтхэг улс халдварын тоогоороо ОХУ-ыг давж гуравдугаарт бичигдлээ. Тус улсад өчигдрийн байдлаар 743 мянган хүн халдвар авч, 20 мянга гаруй хүн нас барсан байна. Тархалт нэмэгдсэнтэй холбогдуулан “Remdesivir” эмийн үнэ долоо дахин нэмэгдсэн төдийгүй зарим эмийн санд дуусаад байгаа юм. Энэ эмийг үйлдвэрлэх эрхтэй дөрвөн үйлдвэр байдаг ч нэг нь л хурдан хугацаанд үйлдвэрлэх боломжтой юм. Энэ үйлдвэр таван улсад бүтээгдэхүүнээ нийлүүлдэг боловч дотоодынхоо хэрэгцээг хангахад хүндрэлтэй болжээ. Энэтхэгийн химичдийн холбооны ерөнхий нарийн бичгийн дарга Ражив Шинхал “Ирэх саруудад тархалт улам нэмэгдэх төлөвтэй байгаа тул үйлдвэр хүчин чадлаа нэмэгдүүлэн ажиллах шаардлагатай. Хэрэв хэн нэгэн хүн “Remdesivir”-ийг хууль бусаар худалдаалахыг завдвал Үндэсний эрүүл мэндийн аюулгүй байдалд халдсан хэмээн шийтгэл ногдуулахаа мэдэгджээ.

Эх сурвалж: “Зууны мэдээ” сонин

2020.7.9  ПҮРЭВ № 133 (6358)