Д.АРИУН
ОХУ-д коронавирусын нөхцөл байдал гайгүй болж байгаатай холбоотойгоор дотоодын аялал жуулчлалыг сэргээх алхамууд хийгдэж байгаагийн нэг нь шууд нислэгүүд юм. Буриадын нийслэл Улаан-Үд рүү жуулчдад зориулсан чартерын нислэг долдугаар сарын 5-наас эхэлж байгаа аж. Москва-Улаан-Үдийн эхний нислэгээр 160 жуулчин Буриад ирсэн бөгөөд Холбооны аялал жуулчлалын агентлагийн дэмжлэгтэйгээр ОХУ-ын TUI аялал жуулчлалын оператор компани зохион байгуулжээ. Москва, Санкт-Петербург болон бусад хотоос Буриадыг үзэж, Байгал нуурт амрахыг хүссэн жуулчид багтжээ.
Буриад нь олон үндэстний бүгд найрамдах улс гэдгээрээ түүх соёлын өвөрмөц дурсгалууд болон байгалийн үзэсгэлэнт газруудаар аялах сонирхолтой хөтөлбөрийг жуулчдад санал болгодог. Буриадад аялах хөтөлбөрт буддын шашны төв Иволгин хийд, үхэшгүй мөнх Итгэлт хамбад мөргөх, буддын шашны соёл уламжлалтай танилцах аялал заавал багтдаг. Мөн дэлхийд гайхагддаг Байгал нуураар аялах аялал зайлшгүй ордог билээ.
Москвагаас энэ зун ес хоногт нэг удаа давтамжтайгаар Буриад руу аялах аяллыг зохион байгуулж, ирэх есдүгээр сарын 22 хүртэлх хугацаанд 1700 гаруй жуулчинд үйлчилнэ гэдэг тооцоог зохион байгуулагчид гаргасан байна.
Эх сурвалж: www.polit.mn
