Д.БАЯР

ОХУ-ын Буриадын бүгд найрамдах улсын Тункин дүүргийн Шулут тосгонд коронавирусын халдвар гарсан тул хорио цээрийн дэглэм тогтоожээ. Тус бүс нутагт олон нийтийг хамарсан арга хэмжээ зохион байгуулахыг хориглосон байгаа. Гэтэл 30 гаруй хүн оролцсон бөө мөргөлийн зан үйл болсон бөгөөд үүний дараа тосгоны 23 иргэн COVID-19-ын халдвар авсан байна. Энэ талаар бүгд найрамдах улсын Хэрэглэгчдийн эрхийг хамгаалах байгууллагаас бямба гаригт хэвлэлийнхэнд мэдээлсэн байна.  “Зургадугаар сарын 9-10-нд Шулут тосгонд болсон бөөгийн зан үйлд 31  хүн оролцсон, тэдэнтэй ойрын хамаарал бүхий 20 гаруй байгаа. Зургадугаар сарын 24-нд Торы болон Шулут тосгонд COVID-19-ын 23 тохиолдол бүртгэгдсэн. Тункин дүүргийн шуурхай удирдлагын төвийн шийдвэрээр Шулут тосгонд хөл хорио тогтоосон” гэж албаны мэдээлэлд тэмдэглэжээ.

Халдвар авсан дөрвөн хүн бүгд найрамдах улсын халдвартын эмнэлэгт эмчлүүлж байна. Мэргэжилтнүүд халдварын хүрээг тодорхойлж, ариутгал хийж, хамаарал бүхий хүмүүсийг хяналтад авчээ.

Буриад эрх баригчид тавдугаар сарын сүүлчээр коронавирусын халдварын улмаас тогтоосон хорио цээрийн дэглэмүүдийг сулруулж эхэлсэн. Ингэснээр жуулчны бааз, нийтийн хоолны газрууд, худалдааны төвүүд ажиллаж, цэцэрлэгт хүрээлэнгүүд нээгдсэн. Гэхдээ амны хаалт заавал зүүх ёстойгоос гадна олон хүн оролцсон арга хэмжээ зохион байгуулахыг хориглосон хэвээр байгаа юм.

Зургадугаар сарын 27-ны байдлаар Буриадад COVID-19-ын халдвар авсан хүний тоо 2857 байгаагийн 1581 нь Улаан-Үд хотноо бүртгэгджээ. Бүгд найрамдах улсын хэмжээгээр 1929 хүн эдгэрсэн байна.

Эх сурвалж: www.polit.mn