Фото: Оксана БРОВАЧ

Д.БАЯР

Польш улсад Ерөнхийлөгчийн сонгуулийн санал хураалт орон нутгийн цагаар ням гаригийн 7 цагт эхэлжээ. Тус улсын хэмжээнд санал хураалтын 27 мянган байр ажиллаж байна. 2020 оны Ерөнхийлөгчийн сонгуульд 11 нэр дэвшигч өрсөлдөж байгаа бөгөөд тэдгээрийн дотор одоогийн Ерөнхийлөгч Анжей Дуда багтаж байна.  

Польшид сонгуулийн санал хураалтад оролцох сонгогчийн тоо нь 30 сая орчим бөгөөд тэдгээрээс 387 мянга нь гадаадад амьдарч байгаа гэсэн тоог баримтыг ТАСС агентлаг мэдээндээ дурдсан байна.

Цар тахлаас шалтгаалан Польшийн сонгуулийн санал хураалтад шинэ хэлбэрүүд орж ирж байгаа юм. Сонгогч санал авах байранд биечлэн очиж саналаа өгөхөөс гадна зайнаас, шуудангаар саналаа өгөх аргыг ч  сонгож болох юм байна. Түүнчлэн санал хураалтын үеэр сонгуулийн комиссын гишүүд болон саналаа өгч байгаа иргэдийн хооронд зай барих дүрмийг нарийн баримталж, амны хаалт зүүж  бээлий өмсөж байна. Мөн санал хураах байруудад гар ариутгагч байрлуулж, саналаа өгөхийн өмнө болон дараа гараа ариутгахыг зөвлөж байгаа аж.

Польш улсын Ерөнхийлөгчийн сонгууль тавдугаар сард болохоор товлогдсон байсан боловч цар тахлын дэгдэлт нэмэгдэж, нөхцөл байдал хүндэрсэнтэй холбоотогоор санал хураалт болохоос дөрөв хоногийн өмнө хойшлуулахаар шийдвэрлэсэн билээ.

Эх сурвалж: www.polit.mn