Т.САЙХАН

ЭМЯ-наас /06.27/ ээлжит мэдээллээ хийж, коронавирусын нөхцөл байдлыг танилцууллаа.

Коронавирус-Монголд

"Зургадугаар сарын 26 -нд ХӨСҮТ-ийн хоёр болон Дархан-Уул аймаг дахь салбар лабораторид 172 хүний сорьцод шинжилгээ хийхэд шинэ коронавирусийн халдвар илрээгүй. Ажиглах байранд байгаа, ОХУ-ын цэргийн онгоцоор ирсэн 75 хүнд шинжилгээ хийхэд коронавирус илрээгүй.Мөн 56 хүний давтан шинжилгээнээс халдвар илрээгүй. Тандалтын зорилгоор БЗД-ийн өрхийн эрүүл мэндийн төв, ЭХЭМҮТ болон Төмөр замын нэгдсэн эмнэлгийн нийт долоон сорьцод шинжилгээ хийхэд коронавирус илрээгүй. Алтанбулагийн хилийн боомтоор орж ирсэн 35 жолоочид шинжилгээ хийхэд коронавирус илрээгүй.  Харин өнөөдөр ХӨСҮТ-д эмчлэгдэж байсан таван хүн эдгэрч, дараагийн шатны хяналтад шилжлээ. Ингэснээр Монгол Улсад батлагдсан коронавирусийн 219 тохиолдлоос 175 хүнийг эмчилж, эдгээжээ" гэж ХӨСҮТ-ийн захирал Д.Нямхүү мэдээлэв. 

Коронавирус- АНУ-д

Зургадугаар сарын 26-ны өдөр АНУ-д 40,500 гаруй шинэ тохиолдол, 2,516 нас баралт бүртгэгдлээ. Ингээд АНУ-д халдвар авсан хүний тоо 2,414,000 гаруй болсноос 124,300 гаруй хүн амиа алдсан байна. 

Коронавирус- Энэтхэг Улс-д

Энэтхэг улсад өчигдөр шинэ тохиолдлын тоо өмнөх өдрүүдээс дахин өсөж, 17,200 гаруй тохиолдол бүртгэгдсэнээр тус улсын нийт халдвар 490,000 гаруйд хүрсэн байна. Мөн өдөр шинээр 407 нас баралт бүртгэгдлээ. Одоогийн байдлаар БНЭУ-д COVID-19 шалтгаант нас баралт 15,300 гаруй бүртгэгдсэнийг нийт хүн амын тоотой нь харьцуулбал 100 мянган хүн тутамд 1.86 байна.

Эх сурвалж: www.polit.mn