П.МӨНГӨНСОР

“УБ Сонгдо” эмнэлэг үүлэн технологид суурилсан Borderless.clinic системээр дамжуулан иргэдийг хаанаас ч эрүүл мэндийн тусламж үйлчилгээ авах боломжийг нээж байна. Тус эмнэлэг “BHG” компанитай хамтран Монгол Улсын эрүүл мэндийн тусламж үйлчилгээний хүртээмж, арга барилыг өөрчлөхөөр ажиллаж байгаа. Энэ системээр дамжуулан эмэгтэйчүүд, эрэгтэйчүүдийн эрүүл мэнд, нөхөн үржихүй, архаг өвчний менежмент, хавдар өвчинд тусламж үйлчилгээ авах боломжтой юм.  Энэ нь дэлхийн шилдэг эмч, мэргэжилтнүүдийн бэлтгэсэн 20 мянга гаруй хуудас контентийг багтаасан ба эмч өвчтөний хооронд орчуулга хийх,  төлбөрийн блокчейн сонголт, нүүр таних чадвартай технологиор тоноглогдсон байна. Өнөөгийн зах зээл дээр байгаа алсын эмчилгээ, оношлогооны төхөөрөмж жижиг дэлгэцээр харьцдаг эмч, мэргэжилтнүүдийн сонирхлыг татдаггүй сул талтай байдаг бол Borderless.clinic нь үүнийг өөрчилж, шинэчлэх зорилготойгоор ажиллаж байгаа юм. 
“BHG” компанийг үүсгэн байгуулагч Вэй Сианг Ю эмч “Энэ систем  эмнэлгийн ажилчид, эмч нарт оношлогоо эмчилгээгээ өргөн хүрээнд үзүүлэх, мэдээлэл контент бэлдэх, ирээдүйн чадварлаг мэргэжилтнүүд болж өөрийн брэндийг бий болгох боломжийг олгож байна” гэв. Монгол эмч, мэргэжилтнүүд Сингапур, Тайланд, Хятад, Европ, Хонгконг, АНУ, Канад, Австрали гэсэн олон улын анагаах ухааны олон салбарын мэргэжилтнүүдтэй хэлний бэрхшээлгүйгээр хамтран ажиллаж, коронавирусын эсрэг хамтдаа тэмцэх боломжтой болж байна. Тус  программ гар утас, таблет, компьютер мөн телевизорын дэлгэцээр эмчилгээ үйлчилгээ үзүүлэх боломжтой юм. “УБ Сонгдо” эмнэлгийн эмч, мэргэжилтнүүд зургаа, долдугаар сард Borderless.clinic платформ дээр сургалт явуулах бөгөөд III улиралд эрүүл мэндийн үйлчилгээг нэвтрүүлэхээр зорилт тавин ажиллаж байна.

Эх сурвалж: www.polit.mn