Т.САЙХАН

Засгийн газрын ээлжит хуралдаанаар 20 гаруй асуудлыг хэлэлцлээ.  Хуралдаанаас гаргасан онцлох шийдвэрүүдийн талаар Засгийн газрын ХМХХ-ийн дарга Ц.Ганзориг өнөөдөр мэдээлэл хийлээ.

Тэрээр "Засгийн газрын өнөөдрийн хуралдаанаар төрийн болон төрийн тусгай албан хаагчдад хөнгөлөлттэй үнээр орон сууц олгох тогтоолыг баталлаа. Тодруулбал цар тахлын үед галын шугамд ажиллаж буй төрийн албан хаагчдад орон сууцаа түрээслээд өмчлөх боломж олгож байна. Уг тусгай хөтөлбөрийг хэрэгжүүлэхийг Ерөнхий сайд У.Хүрэлсүх БХБЯ-ны сайд Бадельхан болон Улаанбаатар хотын дарга С.Амарсайхан нарт даалгалаа. Хөтөлбөрийн хүрээнд урьдчилсан байдлаар 1300-1500 өрхийг орон сууцанд хамруулах боломжтой гэж тооцжээ. Орон сууцны хөнгөлөлтөд хамрагдах төрийн албан хаагчид орлогодоо нийцүүлж тухайн орон сууцны мкб, өрөөг сонгох юм байна. Уг хөтөлбөрийн хэрэгжилтийг Нийслэлийн орон сууцны корпораци хариуцах юм. Тус корпорациас өмнө нь 3000 өрхөд байраа түрээслээд өмчлөх хэлбэрээр боломж олгож, орон сууцанд хамруулсан байна. Энэ тогтолцоогоор төрийн тусгай албан хаагчид орлогод нийцсэн байдлаар орон сууцны мкб, өрөөгөө сонгож түрээслэх байдлаар өмчилнө" хэмээн онцоллоо.

Мөн Засгийн газрын хуралдаан дээр Улсын онцгой комисс мэдээллээ танилцуулжээ. Ирэх даваа гариг  Улсын онцгой комиссын өргөтгөсөн хуралдаан товлогдсон байна. Тус хуралдаанд Ерөнхий сайд У.Хүрэлсүх оролцож, цар тахлын үед гаргасан шийдвэрийн хэрэгжилттэй танилцах ажээ.

Эх сурвалж:www.polit.mn