Т.САЙХАН

ЭМЯ-наас /05.14/ ээлжит мэдээллээ хийж, коронавирусын нөхцөл байдлыг танилцууллаа.

Коронавирис-Монголд

ХӨСҮТ-ээс таван хүн эмчлэгдэн гарч байна. Тэднийг дараагийн шатны ажиглалтад шилжүүлжээ. Дөрөв нь оюутан бол нэг нь 55 настай эмэгтэй. Зарим нь 55 хоног эмчлүүлсэн бол зарим нь  25-30 хоног эмчлүүлсэн байна.  Оюутнууд нь дунджаар 20-22 настай байгаа. Батлагдсан тохиолдол 98 байгаагаас 20 нь эмчлэгдэн гарлаа. ХӨСҮТ-д 171 хүн эмчилгээ, ажиглалтад байна. Тэдэнд 34 эмч, эмнэлгийн ажилтнууд эмчилгээ, үйлчилгээ үзүүлж байгаа.  Тавдугаар сарын 14-нд ХӨСҮТ-ийн хоёр лаборатори болон Дархан-Уул аймгийн вирус судлалын салбар лаборатори, ЗӨСҮТ-ийн лабораторид нийт 381 хүнд шинжилгээ хийлээ. Бүгдэд нь коронавирус илрээгүй гэдгийг ХӨСҮТ-ийн захирал Д.Нямхүү хэллээ.

Коронавирус-АНУ

Өвчний хяналт, сэргийлэлтийн төвөөс COVID-19 халдвартай холбоотойгоор гарч байж болзошгүй хүүхдийн өвчлөлийн талаар эмч нарт хандан анхааруулга, зөвлөмжийг гаргалаа. Кавасаки хам шинж өвчлөлтэй төстэй, эрхтэн тогтолцооны үрэвслийн хам шинжийн өвчлөл тус улсын 18 муж улс болон Вашингтон ДиСи-д бүртгэгдээд байгаа юм. 

Коронавирус-ОХУ

ОХУ-д халдварын тохиолдол сүүлийн 12 хоногийн турш өдөрт 10 мянга гаруйгаар нэмэгдэж байна.  Тус улсад батлагдсан 252 мянга гаруй тохиолдол байна. Москва хотын захирагч энэ сарын 15-ны өдрөөс эхлэн өдөрт 70 мянга орчим, цаашдаа сарын эцэс гэхэд өдөрт 100 мянга орчим хүнийг шинжилгээнд хамруулахаар зорилт дэвшүүлэн ажиллаж байна.

Коронавирус-БНХАУ

БНХАУ-ын хэд хэдэн аймаг болон засаг захиргааны онцгой бүс болох Хонг Конгод халдварын тархалт сэргэж байна. Үүнтэй холбогдуулан ард иргэдээ шинжилгээнд хамруулах ажлыг эрчимжүүлэх замаар халдварын эх уурхайг илрүүлэх шаардлагатай байгааг тус улсын Эрүүл мэндийн хорооноос мэдэгдлээ.

Коронавирус-БНСУ

БНСУ-ын Өвчний хяналт, сэргийлэлтийн төвөөс шөнийн клубүүдийн голомтот халдвараас эх уурхайтай тохиолдлын тоо дахин 27-оор нэмэгдэж, 133 болсныг мэдээлсэн. Тус улсын нийт тохиолдол 11 мянга гаруй, нас баралт 260 байна

Эх сурвалж: www.polit.mn